ഡിറ്റക്റ്റീവായി ഗൗതം മേനോനും യുട്യൂബറായി ജി.വി. പ്രകാശ് കുമാറും; ഇൻവെസ്റ്റിഗേറ്റീവ് ത്രില്ലർ ’13’ ടീസർ പുറത്തുവിട്ടു

സംഗീത സംവിധായകനും ഗായകനുമായി എത്തി പിന്നീട് അഭിനേതാവായും പേരെടുത്തയാളാണ് ജി വി പ്രകാശ് കുമാർ. പ്രകാശ് കുമാർ നായകനാവുന്ന പുതിയ ചിത്രമാണ് 13. ഗൗതം വസുദേവ് മേനോൻ മറ്റൊരു പ്രധാന വേഷത്തിൽ എത്തുന്ന ചിത്രം ഇൻവെസ്റ്റിഗേറ്റീവ് ത്രില്ലർ വിഭാഗത്തിൽ പെടുന്ന ഒന്നാണ്. അതേസമയം ചില ഹൊറർ ഘടകങ്ങളും ഉണ്ട്. ചിത്രത്തിൻറെ ടീസർ അണിയറക്കാർ പുറത്തുവിട്ടു.

1.12 മിനിറ്റ് ദൈർഘ്യമുള്ള ടീസർ കൗതുകമുണർത്തുന്ന ഒന്നാണ്. ഒരു അഭിനേതാവ് എന്ന നിലയിൽ ഗൗതം വസുദേവ് മേനോൻ സ്കോർ ചെയ്യാൻ സാധ്യതയുള്ള ഒരു വേഷം എന്നാണ് ടീസർ നൽകുന്ന സൂചന. കെ വിവേക് ആണ് ചിത്രം സംവിധാനം ചെയ്യുന്നത്. പുറത്തുവന്ന റിപ്പോർട്ടുകൾ പ്രകാരം ജി വി പ്രകാശ് കുമാർ ഒരു യുട്യൂബറെയും ഗൗതം മേനോൻ ഒരു ഡിറ്റക്റ്റീവിനെയുമാണ് അവതരിപ്പിക്കുന്നത്. സെൽഫി എന്ന ചിത്രത്തിനു ശേഷം ജി വി പ്രകാശ് കുമാറും ഗൗതം വസുദേവ് മേനോനും അഭിനേതാക്കളായി ഒരുമിച്ചെത്തുന്നു എന്നത് പ്രേക്ഷകരിൽ താൽപര്യമുണർത്തുന്ന ഘടകമാണ്. ഭവ്യ ത്രിഖ, ആദ്യ പ്രസാദ്, ഐശ്വര്യ, ആദിത്യ കതിർ എന്നിവർ മറ്റു പ്രധാന കഥാപാത്രങ്ങളെ അവതരിപ്പിച്ചിരിക്കുന്നു.

അൻഷു പ്രഭാകർ ഫിലിംസുമായി ചേർന്ന് മദ്രാസ് സ്റ്റുഡിയോസിൻറെ ബാനറിൽ എസ് നന്ദഗോപാൽ ആണ് ചിത്രം സംവിധാനം ചെയ്യുന്നത്. സിദ്ധു കുമാർ ആണ് സംഗീതം പകരുന്നത്. ഛായാഗ്രഹണം സി എം മൂവേന്ദർ, എഡിറ്റിംഗ് ജെ എഫ് കാസ്ട്രോ, പ്രൊഡക്ഷന്‌‍ ഡിസൈനർ ശങ്കർ, വരികൾ മോഹൻ രാജൻ, വിഗ്നേഷ് രാമകൃഷ്ണ, കൊറിയോഗ്രഫി സന്തോഷ്, വസ്ത്രാലങ്കാരം ഹിന, ആക്ഷൻ കൊറിയോഗ്രഫി സ്റ്റണ്ട് രാംകുമാർ, പബ്ലിസിറ്റി ഡിസൈൻ സിപ്‍സൺ. സംവിധായകൻറേത് തന്നെയാണ് ചിത്രത്തിൻറെ രചന.