പത്തു വർഷത്തെ ഇടവേളയ്ക്കു ശേഷം എത്തുന്ന പൃഥ്വിരാജ് ബ്ലെസി ചിത്രം ആടുജീവിതത്തിന്റെ ഓരോ അപ്ഡേറ്റുകളും ആരാധകർ അത്രയും ആവേശത്തോടെ കാത്തിരിക്കുന്ന ഒന്നാണ്. ചിത്രത്തിനു വേണ്ടി താരം നടത്തിയ മേക്ക് ഓവറുകൾ വലിയ പ്രാധാന്യത്തോടെയാണ് ഏവരും ചർച്ച ചെയ്തത്.
ഇപ്പോഴിതാ ചിത്രത്തിന്‍റെ ഒരു പോസ്റ്റര്‍ സോഷ്യല്‍ മീഡിയയില്‍ തരംഗമാവുകയാണ്. മണലാരണ്യത്തില്‍ ആടുകളുടെ പശ്ചാത്തലത്തില്‍ നില്‍ക്കുന്ന പൃഥ്വിരാജിന്‍റെ നജീബ് ആണ് പോസ്റ്ററില്‍. സിനിമകളുടെ പ്രധാനപ്പെട്ട അന്തര്‍ദേശീയ മാര്‍ക്കറ്റുകളില്‍ ഒന്നായ അമേരിക്കന്‍ ഫിലിം മാര്‍ക്കറ്റില്‍ ഇന്‍ഡിവുഡ് ഡിസ്ട്രിബ്യൂഷന്‍ നെറ്റ്‍വര്‍ക്കിന്‍റെ ഡിസ്പ്ലേ ബോര്‍ഡില്‍ നിന്നുള്ള പോസ്റ്റര്‍ ആണിത്.
നിങ്ങളുടെ വാട്സപ്പിൽ അതിവേഗം വാർത്തകളറിയാൻ ജാഗ്രതാ ലൈവിനെ പിൻതുടരൂ Whatsapp Group | Telegram Group | Google News | Youtube
പാറിപ്പറന്ന മുടിയും അഴുക്ക് പുരണ്ട മുഖവുമൊക്കെയായാണ് പോസ്റ്ററില്‍ നജീബിന്‍റെ നില്‍പ്പ്. മേക്കോവര്‍ മാത്രമല്ല, പ്രകടനത്തിലും പൃഥ്വി പ്രേക്ഷകരെ ഞെട്ടിക്കുമെന്ന പ്രതീക്ഷ നല്‍കുന്നതാണ് പോസ്റ്റര്‍. ആടുജീവിതത്തിന്റെ ആദ്യ ഒഫിഷ്യല്‍ പോസ്റ്റര്‍ എന്ന തരത്തിലാണ് പ്രമുഖ ട്രേഡ് അനലിസ്റ്റുകളടക്കം ഈ പോസ്റ്റര്‍ പങ്കുവച്ചിരിക്കുന്നത്.
160 ന് മുകളില്‍ ദിവസങ്ങളാണ് ആടുജീവിതത്തിന്റെ ചിത്രീകരണത്തിനായി ബ്ലെസിക്കും സംഘത്തിനും വേണ്ടി വന്നത്. എന്നാല്‍ നാലര വര്‍ഷം കൊണ്ടാണ് ബ്ലെസിയും സംഘവും ഇത് സാധിച്ചെടുത്തത്. 2013 ല്‍ പുറത്തിറങ്ങിയ കളിമണ്ണ് ആണ് അവസാനമായി പുറത്തിറങ്ങിയ ചിത്രം.
