ചങ്ങനാശേരി: കുറിച്ചി എട്ടുമുറി കോളനി നിവാസികൾക്ക് വീട് എന്നത് ഇനി സ്വപ്‌നമല്ല. പശുത്തൊഴുത്തായി കിടന്ന ഏഴു വീടുകളാണ് ഇനി പുതുമയുടെ കവചമണിയുന്നത്. ജില്ലാ പഞ്ചായത്തിന്റെ പദ്ധതിയിൽപ്പെടുത്തിയാണ് എട്ടുമുറി കോളനി നവീകരിക്കുന്നത്. ഇതോടെ കോളനിയുടെ തന്നെ സമഗ്ര വികസനമാണ് യാഥാർത്ഥ്യമാകുന്നത്.
നൂറു വർഷത്തിലേറെ പഴക്കമുണ്ട് എട്ടുമുറി കോളനിയിലെ വീടുകൾക്ക്. സർ സി.പിയുടെ ദിവാൻ ഭരണകാലത്താണ് ഇവിടെ പട്ടികജാതി പട്ടിക വർഗവിഭാഗത്തിൽപ്പെട്ടവർക്ക് താമസിക്കുന്നതിനായി നാൽപ്പത് വീടുകൾ നിർമ്മിച്ചു നൽകിയത്. ഈ വീടുകളിലുള്ളവർക്ക് പശുവിനെ വളർത്തുന്നതിനായി എട്ടായി വിഭജിച്ചിരുന്ന തൊഴുത്തായിരുന്നു എട്ടുമുറിയിലേത്. ഇവിടെ പശുത്തൊഴുത്തിൽ പിന്നീട് പട്ടിക ജാതി പട്ടിക വർഗ വിഭാഗങ്ങളിലെ പാവങ്ങൾ താമസമാക്കുകയായിരുന്നു. നൂറു വർഷം കഴിഞ്ഞെങ്കിലും ഈ കോളനിയിലെ വീടുകളിൽ അറ്റകുറ്റപണികൾ നടത്തുന്നതിനു മാത്രം അധികൃതർ ആരും തന്നെ തയ്യാറായില്ല. പൊളിഞ്ഞ് വീഴാറായ വീടുകളിലായിരുന്നു ഇവരിൽ പലരുടെയും താമസം.
നിങ്ങളുടെ വാട്സപ്പിൽ അതിവേഗം വാർത്തകളറിയാൻ ജാഗ്രതാ ലൈവിനെ പിൻതുടരൂ Whatsapp Group | Telegram Group | Google News | Youtube
പല തവണ അധികൃതർക്ക് അടക്കം നിവേദനം നൽകിയെങ്കിലും വീടുകളുടെ നവീകരണം മാത്രം നടന്നിരുന്നില്ല. ഇതിനിടെയാണ് ജില്ലാ പഞ്ചായത്ത് അംഗം പി.കെ വൈശാഖ് തന്റെ തിരഞ്ഞെടുപ്പ് പ്രകടന പത്രികയിലെ വാഗ്ദാനം നടപ്പാക്കാൻ മുന്നിട്ടിറങ്ങിയത്. തുടർന്നു ജില്ലാ പഞ്ചായത്ത് കുറിച്ചി ഡിവിഷനിലെ പ്രോജക്ടുകളിൽ ഉൾപ്പെടുത്തി എട്ടുമുറി കോളനിയിലെ ഏഴു വീടുകൾ നവീകരിക്കുകയായിരുന്നു. പി.കെ വൈശാഖിന്റെ നേതൃത്വത്തിൽ യൂത്ത് കോൺഗ്രസ് പ്രവർത്തകരാണ് വീട് നവീകരണ പ്രവർത്തനങ്ങളിൽ ഏർപ്പെട്ടിരിക്കുന്നത്.
പട്ടികജാതി പട്ടികവർഗ്ഗ വിഭാഗത്തിൽ അഞ്ചു വീടുകളും ജനറൽ വിഭാഗത്തിൽ 2 വീടുകളും ആണ് നിർമ്മിച്ച് നൽകുന്നത്. സാങ്കേതിക കാരണങ്ങളാൽ 7 വീടുകൾ പണിയുന്നതിന് സർക്കാർ അനുമതി ലഭിച്ചിരുന്നില്ല. എന്നാൽ, ജില്ലാ പഞ്ചായത്തംഗം പി.കെ വൈശാഖ് മുൻകൈ എടുത്ത് വീടിന്റെ നവീകരണ പ്രവർത്തനങ്ങൾ നടത്തുകയായിരുന്നു. ഒരു വീടിന് നാലു ലക്ഷത്തോളം രൂപയാണ് അനുവദിച്ചിരിക്കുന്നത്.
