ലണ്ടൻ: ഇംഗ്ലീഷ് പ്രീമിയർ ലീഗിൽ തകർപ്പൻ വിജയവുമായി ആഴ്‌സണൽ. വെസ്റ്റ് ഹാമിനെ രണ്ടിനെതിരെ അഞ്ചു ഗോളിനാണ് ആഴ്‌സണൽ തകർത്തു തരിപ്പണമാക്കിയത്. ഏഴു ഗോളുകളും വീണത് ആദ്യ പകുതിയിലാണ് എന്നതാണ് മത്സരത്തിലെ പ്രധാന കൗതുകം. പത്താം മിനിറ്റിൽ ഗബ്രിയേൽ മാഗ്ലഹാസ് നേടിയ ഗോളിലൂടെ ആഴ്‌സണലാണ് മുന്നിൽ എത്തിയത്. 27 ആം മിനിറ്റിൽ ലെനാർഡോ ടോർസാഡ് രണ്ടാം ഗോളും 34 ആം മിനിറ്റിൽ മാർട്ടിൻ ഒഡേഗാർഡ് പെനാലിറ്റിയിലൂടെ മൂന്നാം ഗോളും 36 ആം മിനിറ്റിൽ കായ് ഹാവേർട്‌സ് നാലാം ഗോളും നേടിയ ശേഷം മാത്രമാണ് വെസ്റ്റ് ഹാമിന് തിരിച്ചടിയ്ക്കാൻ പോലും ആയത്. ആരോൺ വാൻ ബിസ്‌കയിലൂടെ 38 ആം മിനിറ്റിലാണ് വെസ്റ്റ് ഹാം ആദ്യ ഗോൾ അടിച്ചത്. എമേഴ്‌സണിലൂടെ നാൽപതാം മിനിറ്റിൽ രണ്ടാം ഗോൾ അടിച്ചതിനു പിന്നാലെ ആദ്യ പകുതിയുടെ ഇടവേളയ്ക്കു മുൻപ് ലഭിച്ച പെനാലിറ്റി ഗോളാക്കി ബുക്കായോ സാഖ കളിയിലെ ഗോൾ പട്ടിക പൂർത്തിയാക്കി.
