കർക്കിട മാസത്തിൽ മലയാളികൾ വളരെയധികം ആസ്വദിക്കുന്ന ഒന്നാണ് കർക്കിടക കഞ്ഞി. നല്ല ആരോഗ്യത്തിന് വളരെ പ്രധാനമാണ് കർക്കിടക ക‍ഞ്ഞി. കർക്കിടക മാസത്തിൽ എല്ലാ വീടുകളിലും കർക്കിടക മാസത്തിൽ കർക്കിടക കഞ്ഞി കുടിക്കാറുണ്ട്. ധാരാളം ഗുണങ്ങളുള്ള ഈ കഞ്ഞി തയാറാക്കാൻ വളരെ എളുപ്പമാണ്. ആരോഗ്യപരിപാലനത്തിനായി പരമ്പരാഗത ഔഷധ കൂട്ടുകളാൽ തയാറാക്കുന്നതാണ് കർക്കിട ക‍ഞ്ഞി. രോഗപ്രതിരോധ ശേഷി കൂട്ടാൻ ഏതെങ്കിലും ഒരു നേരം കർക്കിടക കഞ്ഞി കുടിക്കുന്നത് ഗുണം ചെയ്യും.

എന്തൊക്കെ ആരോഗ്യ ഗുണങ്ങൾ ലഭിക്കും

കര്‍ക്കിടകത്തിലെ ആദ്യ ഏഴ് ദിനങ്ങളിലാണ് കർക്കിടക കഞ്ഞി കുടിക്കേണ്ടത്. വേനല്‍ കാലത്തെ ശാരീരിക അധ്വാനത്തിന്റേയും ക്രമരഹിത ഭക്ഷണത്തിൻ്റെയും ഫലമായി ഉണ്ടാകുന്ന പ്രശ്നങ്ങളെ ഇല്ലാതാക്കുന്നതാണ് കർക്കിടക കഞ്ഞി. ശരീരത്തിൻ്റെ രോഗപ്രതിരോധ ശേഷി കൂട്ടാൻ വളരെ നല്ലതാണ് കർക്കിടക കഞ്ഞി. വർഷത്തിലുടനീളം നല്ല ആരോഗ്യം നൽകാൻ ഈ കർക്കിടക കഞ്ഞി സഹായിക്കും. പ്രമേഹം, കൊളസ്ട്രോൾ, എന്നിവയ്ക്ക് ഏറെ നല്ലതാണ് കർക്കിടക കഞ്ഞി. ശരീരത്തിനെ പുനരുജ്ജീവിപ്പിക്കാൻ സഹായിക്കുന്നതാണ് കർക്കിടക കഞ്ഞി. ശരീരത്തിലെ വിഷവസ്തുക്കളെ പുറന്തള്ളാൻ നല്ലതാണ് കർക്കിടക കഞ്ഞി.

ആവശ്യമുള്ള ചേരുവകൾ

ഉണക്കലരി അര കപ്പ്‌

ഉലുവ 1 ടീസ്പൂൺ‌

ജീരകം 1 ടീസ്പൂൺ‌

കടുക് 1 ടീസ്പൂൺ

എള്ള് 1 ടീസ്പൂൺ

മഞ്ഞൾപ്പൊടി 1/4 ടേബിൾസ്പൂൺ

തേങ്ങാപ്പാൽ 1/2 മുറി തേങ്ങയുടെ

മാവ് ഇല 5 എണ്ണം

പ്ലാവ് ഇല 4 എണ്ണം

ഉപ്പ് ആവശ്യമെങ്കിൽ മാത്രം

തയ്യാറാക്കുന്ന വിധം

അരി നന്നായി കഴുകി വ്യത്തിയാക്കി എടുക്കണം. അതിന് ശേഷം ഒരു 30 മിനിറ്റ് ഇത് കുതിർത്ത് വയ്ക്കുക. ഇത് പോലെ കടുക്, എള്ള്, ഉലുവ, ജീരകം എന്നിവയും കഴുകി വ്യത്തിയാക്കി 30 മിനിറ്റ് വെള്ളത്തിൽ കുതിർത്ത് വയ്ക്കുക. അതിന് ശേഷം കടുകും ഉലുവയും ജീരകം എള്ള് എന്നിവ നന്നായി മിക്സിയിലിട്ട് അരച്ച് എടുക്കുക. ഇനി മൺകലത്തിൽ കഴുകി വച്ചിരിക്കുന്ന അരി ഇട്ട് നന്നായി തിളപ്പിക്കുക. അരച്ചു വച്ച പേസ്റ്റും അൽപ്പം മഞ്ഞൾപ്പൊടിയും ചേർത്ത് ഇളക്കുക. ഇത് നന്നായി തിളച്ച് വരുമ്പോൾ ഇലകൾ രണ്ടും അരിഞ്ഞ് ഇതിലേക്ക് ചേർക്കാം. നന്നായി കഞ്ഞി വേന്ത് വരുമ്പോൾ ഇതിലേക്ക് തേങ്ങാപ്പാൽ ഒഴിച്ച് അഞ്ച് മിനിറ്റ് കൂടി വേവിക്കാം. ഔഷധ കഞ്ഞി തയാറാക്കാൻ ഔഷധങ്ങൾ അരച്ച് പിഴിഞ്ഞെടുത്ത് നീര് ചേർക്കാവുന്നതാണ്.