പരുത്തുംപാറ : പരുത്തുംപാറ – നെല്ലിക്കൽ റോഡിൽ യുവാക്കൾ സഞ്ചരിച്ച കാർ നിയന്ത്രണം വിട്ട് കടയുടെ മുൻവശത്തേയ്ക്ക് ഇടിച്ചു കയറി. കാണിക്ക മണ്ഡപത്തിനു സമീപം റോഡിന്റെ തെക്കുവശത്തുള്ള വി ആർ ജൂവലറിയുടെ മുൻവശത്തേയ്ക്കാണ് രാവിലെ പത്തരയോടു കൂടി അപകടം ഉണ്ടായത്. ഞായറാഴ്ചയായിരുന്നതിനാൽ കട തുറന്നിരുന്നില്ല. ജൂവലറിയുടെ മുൻ വശത്തിരുന്ന ഒരു ബൈക്കിനും കാറിന്റെ മുൻവശത്തിനും സാരമായ കേടുപാടുകളുണ്ടായി. തൊട്ടടുത്ത അശ്വതി ഹോട്ടലിനു മുൻ വശത്തിരുന്ന ഒരു ബൈക്കും കാർ ഇടിച്ച് മറിച്ചു.
പള്ളികളിലും ക്ഷേത്രങ്ങളിലും പോയി ആളുകൾ തിരികെ പോകുന്ന തിരക്കേറിയ സമയത്താണ് അപകടം നടന്നതെങ്കിലും ആർക്കും പരുക്കില്ല. ജ്യൂവലറി ഉടമയുടെ ഭാര്യ ഉൾപ്പെടെ ഹോട്ടലിൽ ഭക്ഷണം കഴിക്കുവാനെത്തിയ പലരും പരുക്കേൽക്കാതെ തലനാരിഴയ്ക്കാണ് രക്ഷപെട്ടത്. ഒരാഴ്ച മുൻപ് വാങ്ങിയ പുതിയ വാഗൺ ആർ മാരുതി കാർ ചിങ്ങവനം പോളച്ചിറ സ്വദേശിയുടെതാണ്. അപകടം നടന്നതിനു പിന്നാലെ എത്തിയ തിരുവഞ്ചൂർ രാധാകൃഷ്ണൻ എം എൽ എ അപകടസ്ഥലം സന്ദർശിച്ചു.
