കോട്ടയം: കടുത്തുരുത്തി കോതനല്ലൂരിൽ നിയന്ത്രണം നഷ്ടമായ ബൈക്ക് ട്രാവലറിൽ ഇടിച്ച് യുവാവ് മരിച്ചു. ഒപ്പമുണ്ടായിരുന്ന സുഹൃത്തിനെ ഗുരുതരമായ പരിക്കുകളോടെ മുട്ടുചിറയിലെ സ്വകാര്യ ആശുപത്രിയിൽ പ്രവേശിപ്പിച്ചു. മരിച്ചത് അതിരമ്പുഴ സ്വദേശിയാണ് എന്നു തിരിച്ചറിഞ്ഞിട്ടുണ്ട്. ഇയാളുടെ ബന്ധുക്കൾ എത്തുന്നിനു വേണ്ടി കാത്തിരിക്കുകയാണ് പൊലീസ് സംഘം. ഏറ്റുമാനൂർ ഭാഗത്തു നിന്നും കടുത്തുരുത്തി ഭാഗത്തേയ്ക്കു പോകുകയായിരുന്നു യുവാക്കൾ. ഇവർ സഞ്ചരിച്ച ബൈക്ക് എതിർ ദിശയിൽ നിന്നും എത്തിയ ട്രാവലറിൽ ഇടിയ്ക്കുകയായിരുന്നു. ഇടിയുടെ ആഘാതത്തിൽ രണ്ടു പേരും റോഡിൽ തലയിടിച്ചു തെറിച്ചു വീണു. ഇതുവഴി എത്തിയ പൊലീസ് സംഘമാണ് രണ്ടു പേരെയും ആശുപത്രിയിൽ എത്തിച്ചത്. ഒരാൾ സംഭവ സ്ഥലത്തു തന്നെ മരിച്ചു. ബൈക്ക് യാത്രക്കാർ അമിത വേഗത്തിലായിരുന്നതായി നാട്ടുകാർ പറഞ്ഞു. അപകടത്തെ തുടർന്ന് ഏറ്റുമാനൂർ കടുത്തുരുത്തി റോഡിൽ ഗതാഗത തടസവും ഉണ്ടായി.
