കോട്ടയം: മെഡിക്കൽ കോളേജ് ആശുപത്രിയിൽ നിന്നും ഇ.എസ്.ഐയിലേയ്ക്കുള്ള റോഡിൽ മുടിയൂർക്കരയ്ക്കു സമീപം വെള്ളിമൂങ്ങ ഓട്ടോറിക്ഷ കത്തിച്ച് ഓട്ടോഡ്രൈവറെ കൊലപ്പെടുത്താൻ ശ്രമം. പാലായിൽ നിന്നും ഓട്ടം വിളിച്ചു കൊണ്ടു വന്ന ഓട്ടോറിക്ഷയാണ്, മുടിയൂർക്കരയ്ക്കു സമീപം ആളൊഴിഞ്ഞ സ്ഥലത്തെത്തിച്ച് കത്തിച്ചത്. അപകടം മണത്ത ഓട്ടോഡ്രൈവറായ യുവാവ് വാഹനത്തിൽ നിന്നും ഇറങ്ങിയോടി രക്ഷപെട്ടതിനാൽ വൻ ദുരന്തം ഒഴിവായി. സംഭവവുമായി ബന്ധപ്പെട്ട് ഒരാളെ ഗാന്ധിനഗർ സ്റ്റേഷൻ ഹൗസ് ഓഫിസർ കെ.ഷിജിയുടെ നേതൃത്വത്തിലുള്ള സംഘം കസ്റ്റഡിയിൽ എടുത്തു.
വെള്ളിയാഴ്ച രാത്രി പത്തരയോടെയായിരുന്നു നാടിനെ നടുക്കിയ സംഭവം ഉണ്ടായത്. പാലാ പൂവരണിയിൽ നിന്നും ഓട്ടം വിളിച്ചുകൊണ്ടു വന്ന വെള്ളിമുങ്ങ ഓട്ടോ ടാക്‌സിയാണ് ഈ വാഹനത്തിലുണ്ടായിരുന്ന യുവാവ് കത്തിച്ചത്. ഓട്ടോ ഡ്രൈവർ ഓടിക്കുന്നതിനിടെ, ഇയാൾ ഇടവഴിയിലേയ്ക്കു വാഹനം കയറ്റണമെന്നു നിർദേശിക്കുകയായിരുന്നു. പിന്നീട്, ഇയാൾ വാഹനം നിർത്തിയ ശേഷം ഓട്ടോറിക്ഷ കത്തിക്കുകയായിരുന്നുവെന്നും, ഈ സമയം താൻ ഇറങ്ങിയോടിയെന്നും ഓട്ടോ ഡ്രൈവർ പൊലീസിനു വിവരം നൽകിയിട്ടുണ്ട്.
നിങ്ങളുടെ വാട്സപ്പിൽ അതിവേഗം വാർത്തകളറിയാൻ ജാഗ്രതാ ലൈവിനെ പിൻതുടരൂ Whatsapp Group | Telegram Group | Google News | Youtube
ഇയാൾ നൽകിയ വിവരത്തിന്റെ അടിസ്ഥാനത്തിലാണ് പ്രതിയെന്നു സംശയിക്കുന്നയാളെ പൊലീസ് സംഘം കസ്റ്റഡിയിൽ എടുത്തത്. എന്നാൽ, കസ്റ്റഡിയിൽ എടുത്തയാളെ വിശദമായി ചോദ്യം ചെയ്തു വരികയാണ്. ഇരുവരുടെയും മൊഴി തമ്മിൽ വൈരുദ്ധ്യമുള്ളതിനാൽ വ്യക്തമായി സൂചനകളൊന്നും ലഭിച്ചിട്ടില്ലെന്നു പൊലീസ് പറഞ്ഞു. സംഭവം എന്താണ് എന്നത് അടക്കമുള്ള കാര്യങ്ങളിൽ കൃത്യമായ വ്യക്തത ലഭിക്കണമെങ്കിൽ പ്രതിയെ ചോദ്യം ചെയ്യണം. ഇതുമായി ബന്ധപ്പെട്ടുള്ള അന്വേഷണം ആരംഭിച്ചതായും ഗാന്ധിനഗർ പൊലീസ് അറിയിച്ചു.
