കോട്ടയം : പുത്തേട്ട് വള്ളം മറിഞ്ഞ് ആറ്റില്‍ വീണ മധ്യവയസ്കയെ രക്ഷപെടുത്തി. പുത്തേട്ട് ഫോറസ്റ്റ് ഡിപ്പാര്‍ട്ട്‌മെന്റിന് സമീപം വളളത്തില്‍ സഞ്ചരിക്കുകായിരുന്ന സരസമ്മയാണ് നിയന്ത്രണം നഷ്ടമായി വെള്ളത്തില്‍ വീണത് .ഇവര്‍ വീഴുന്നത് കണ്ട പ്രദേശവാസിയായ ഓമനക്കുട്ടന്‍ എന്നയാളാണ് ഇവരെ രക്ഷപെടുത്തിയത്. പ്രദേശത്ത് കടത്തിനായി ഉപയോഗിച്ചിരുന്ന വള്ളത്തില്‍ ആറ് മുറിച്ചുകടക്കാന്‍ ശ്രമിക്കവെയായിരുന്നു അപകടം . സാധാരണ കടത്തുകാരന്‍ സ്ഥലത്തില്ലാത്ത സമയങ്ങളില്‍ യാത്രക്കാര്‍ തനിയെ വള്ളമെടുത്ത് പോകാറുണ്ട്. ഇത്തരത്തില്‍ സരസമ്മ തനിയെ സഞ്ചരിക്കുമ്പോഴായിരുന്നു അപകടം. ആറിന് മധ്യഭാഗത്ത് എത്തിയപ്പോള്‍ തുഴ വെള്ളത്തില്‍ വീണു. തുടര്‍ന്ന് നിയന്ത്രണം നഷ്ടമായി ഇവര്‍ വെള്ളത്തിലേക്ക് വീഴുകയായിരുന്നു എന്ന് ദൃക്‌സാക്ഷി കൂടിയായ ഓമനക്കുട്ടന്‍ ജാഗ്രത ന്യൂസിനോട് പറഞ്ഞു. വെള്ളത്തിലേക്ക് ചാടിയ ഓമനക്കുട്ടന്‍ ഇവരെ കരയ്‌ക്കെത്തിച്ച ശേഷം ബഹളം വെച്ചതോടെ സമീപത്തുണ്ടായിരുന്ന ഫോറസ്റ്റ് ഉദ്യോസ്ഥരെത്തി. തുടർന്ന് ഇവരുടെ തന്നെ വാഹനത്തിൽ ഇവരെ കോട്ടയം മെഡിക്കല്‍ കോളേജിലേക്ക് മാറ്റി.
