കോട്ടയം: സംക്രാന്തിയിൽ പേരൂർ റോഡിൽ നിയന്ത്രണം വിട്ട കാർ റോഡരികിലേയ്ക്കു ഇടിച്ചു കയറി. റോഡരികിൽ നിന്ന കാൽ നടയാത്രക്കാരായ നാലു പേർക്ക് പരിക്കേറ്റു. അപകടത്തിൽ പരിക്കേറ്റ സംക്രാന്തി പെരുമ്പായിക്കാട് തൊട്ടിക്കാലായിൽ ഷൺമുഖ(55)നെ കോട്ടയം മെഡിക്കൽ കോളേജ് ആശുപത്രിയിൽ പ്രവേശിപ്പിച്ചു. അപകടത്തിൽ പരിക്കേറ്റ മറ്റുള്ളവരെയും മെഡിക്കൽ കോളേജ് ആശുപത്രിയിൽ എത്തിച്ചിട്ടുണ്ട്. വ്യാഴാഴ്ച വൈകിട്ട് മൂന്നു മണിയോടെയായിരുന്നു കേസിനാസ്പദമായ സംഭവം. കോട്ടയത്തെ വാഹന ഷോറൂമിൽ നിന്നും ഡെലിവറി എടുത്ത കാറുമായി എത്തിയതായിരുന്നു പാലാ സ്വദേശി. കാർ പേരൂർ റോഡിലേയ്ക്കു തിരിയുന്നതിനിടെ നിയന്ത്രണം നഷ്ടമായി സമീപത്തെ കടയുടെ ഷട്ടിറിലേയ്ക്ക് ഇടിച്ചു കയറുകയായിരുന്നു. അപകടത്തിൽ റോഡരികിൽ നിന്ന നാലു പേർക്ക് സാരമായി പരിക്കേറ്റു. ഓടിക്കൂടിയ നാട്ടുകാർ ചേർന്നാണ് പരിക്കേറ്റവരെ കോട്ടയം മെഡിക്കൽ കോളേജ് ആശുപത്രിയിൽ എത്തിച്ചത്. അപകടത്തെ തുടർന്നു ഇവിടെ ഗതാഗത തടസവും ഉണ്ടായി.
