കോട്ടയം: മാന്നാനം ഷാപ്പും പടിയിൽ ഇടുക്കി സ്വദേശിയുടെ ആത്മഹത്യാ ഭീഷണി. പ്രദേശത്തെ വീടിനു സമീപത്തെ ടെലഫോൺ ടവറിൽ കയറിയിരുന്നാണ് ഇടുക്കി സ്വദേശി ആത്മഹത്യാ ഭീഷണി മുഴക്കിയത്. മരപ്പണിക്കാരനായ ഇടുക്കി മാമലക്കണ്ടം സ്വദേശി ഷിബുവാണ് പ്രദേശത്തെ ടവറിനു മുകളിൽ കയറി ഭീഷണി മുഴക്കുന്നത്. ഞായറാഴ്ച ഉച്ചയ്ക്ക് മൂന്നു മണിയോടെയാണ് ഇടുക്കി സ്വദേശി പ്രദേശത്തെ ടവറിനു മുകളിൽ കയറിയത്. ഇവിടെ മരപ്പണിക്കായി എത്തിയതായിരുന്നു ഇയാൾ. ലഹരിയ്ക്കടിയമാണ് എന്നു സംശയിക്കുന്ന ഇയാൾ ടവറിനു മുകളിൽ കയറി ജീവനൊടുക്കാൻ ശ്രമം നടത്തുകയായിരുന്നു. ഇയാൾ ടവറിനു മുകളിൽ കയറിയത് കണ്ട നാട്ടുകാർ വിവരം ഗാന്ധിനഗർ പൊലീസിനെയും, അഗ്നിരക്ഷാ സേനാ സംഘത്തെയും അറിയിച്ചു. ഗാന്ധിനഗർ പൊലീസും അഗ്നിരക്ഷാ സേനാ സംഘവും സ്ഥലത്ത് എത്തിയിട്ടുണ്ട്. ടവറിന്റെ അടിയിൽ വല കെട്ടി അപകടം ഒഴിവാക്കുന്നതിനുള്ള നടപടികൾ അഗ്നിരക്ഷാ സേനാ സംഘം സ്വീകരിച്ചിട്ടുണ്ട്. ഇയാളെ അനുനയിപ്പിച്ച് താഴെയിറക്കാനുള്ള ശ്രമങ്ങൾ തുടരുകയാണ്.
