പനച്ചിക്കാട് : കുടുംബശ്രീ സി ഡി എസ് ന്റെ നേതൃത്വത്തിൽ അയൽക്കൂട്ട ശാക്തീകരണ പരിപാടിയായ ‘ തിരികെ സ്കൂളിൽ ‘ചിങ്ങവനം എൻ എസ് എസ് ഹയർ സെക്കണ്ടറി സ്കൂളിൽ നടത്തി. സ്കൂൾ അസംബ്ലിയോടു കൂടിയാണ് പരിപാടിക്ക് തുടക്കം കുറിച്ചത് .തുടർന്ന് കുടുംബശ്രീ മുദ്രാഗീതം അവതരണം നടന്നു . പിന്നീട് മധുരം വിതരണം ചെയ്തു . ഹൈസ്കൂൾ വാർഡിലെ കാരുണ്യ വയോജന കുടുംബശ്രീയിലെ മുതിർന്ന അംഗം അമ്മിണി വാവ ഫ്ലാഗ് ഓഫ് ചെയ്ത് ഉദ്ഘാടനം നടത്തി. 5 ക്ലാസ്മുറികളിലായി രാവിലെ 10 മണി മുതൽ വൈകുന്നേരം 4 . 30 വരെ നടന്ന ക്ലാസുകളിൽ വിവിധ വാർഡുകളിൽ നിന്നും നൂറിലധികം കുടുംബശ്രീ അംഗങ്ങൾ മുഴുവൻ സമയവും പങ്കെടുത്തു . തെരഞ്ഞെടുക്കപ്പെട്ട റിസോഴ്സ് പേഴ്സൺമാർ വിവിധ വിഷയങ്ങളിൽ ക്ലാസുകൾ എടുത്തു . കുടുംബശ്രീ സി ഡി എസ് ചെയർപേഴ്സൺ ബിന്ദു ജിജി , വൈസ് ചെയർപേഴ്സൺ പൊന്നമ്മചന്ദ്രൻ , അക്കൗണ്ടന്റ് ഷൈലജ എന്നിവർ നേതൃത്വം നൽകി.
