കൊച്ചി: സന്തോഷ് ട്രോഫിയില്‍ തകര്‍പ്പന്‍ ജയങ്ങളുമായി ഫൈനല്‍ റൗണ്ടില്‍ കടന്ന് കേരളം. സൗത്ത് സോണ്‍ ഗ്രൂപ്പ് ബിയിലെ യോഗ്യതാ റൗണ്ടിലെ അവസാന മത്സരത്തില്‍ പുതുച്ചേരിക്കെതിരെ ഒന്നിനെതിരെ നാല് ഗോളുകള്‍ക്കാണ് കേരളത്തിന്റെ ജയം.
നേരത്തെ ലക്ഷദ്വീപിനേയും ആന്‍ഡമാനേയും കേരളം വലിയ ഗോള്‍ വ്യത്യാസത്തില്‍ തോല്‍പ്പിച്ചിരുന്നു. മൂന്ന് കളിയും ജയിച്ച് 9 പോയിന്റോടെ ഗ്രൂപ്പ് ജേതാക്കളായാണ് കേരളം ഫൈനല്‍ റൗണ്ടിലേക്ക് കടന്നത്. 21ാം മിനിറ്റില്‍ പെനാല്‍റ്റിയിലൂടെ വല കുലുക്കി ഗില്‍ബര്‍ട്ട് ആണ് പുതുച്ചേരിക്കെതിരെ കേരളത്തിന്റെ അക്കൗണ്ട് തുറന്നത്.
നിങ്ങളുടെ വാട്സപ്പിൽ അതിവേഗം വാർത്തകളറിയാൻ ജാഗ്രതാ ലൈവിനെ പിൻതുടരൂ Whatsapp Group | Telegram Group | Google News | Youtube
മൂന്ന് മത്സരങ്ങളില്‍ നിന്ന് കേരളം നേടിയത് 18 ഗോള്‍
24ാം മിനിറ്റില്‍ ലീഡ് ഉയര്‍ത്തി അര്‍ജുന്‍ ജയരാജിന്റെ ഗോള്‍ എത്തി. 39ാം മിനിറ്റിലാണ് പുതുച്ചേരി ഗോള്‍ കണ്ടെത്തിയത്. അന്‍സന്‍ സി ആന്റോയിലൂടെയായിരുന്നു ഇത്. 55ാം മിനിറ്റില്‍ നൗഫല്‍ കേരളത്തിനായി മൂന്നാം ഗോള്‍ നേടി. 57ാം മിനിറ്റില്‍ തന്നെ ബുജൈറും വല കുലുക്കി.
ആദ്യ കളിയില്‍ ലക്ഷദ്വീപിനെ എതിരില്ലാത്ത അഞ്ച് ഗോളിനാണ് കേരളം തോല്‍പ്പിച്ചത്. രണ്ടാമത്തെ കളിയില്‍ ദുര്‍ബലരായ ആന്‍ഡമാന് എതിരെ കേരളം ഗോള്‍മഴ തീര്‍ത്തു. 9-0നായിരുന്നു കേരളത്തിന്റെ ജയം. മൂന്ന് മത്സരങ്ങളില്‍ നിന്ന് 18 ഗോളുകളാണ് കേരളം നേടിയത്. വഴങ്ങിയത് ഒരു ഗോള്‍ മാത്രം.
