ടെക്സസ്: ഇലോണ്‍ മസ്‌കിന്‍റെ സ്പേസ് എക്സ് കമ്പനി സ്റ്റാര്‍ഷിപ്പ് ഗ്രഹാന്തര റോക്കറ്റിന്‍റെ എട്ടാം പരീക്ഷണ വിക്ഷേപണം ഇന്ന് നടത്തും. ഏഴാം വിക്ഷേപണ പരീക്ഷണത്തില്‍ സ്റ്റാര്‍ഷിപ്പിന്‍റെ ഏറ്റവും മുകളിലെ ഷിപ്പ് ഭാഗം പൊട്ടിത്തെറിച്ചതിന്‍റെയും എട്ടാം പരീക്ഷണം പലകുറി മാറ്റിവച്ചതിന്‍റെയും ക്ഷീണം മാറ്റാനാണ് സ്പേസ് എക്സ് ദക്ഷിണ ടെക്സസിലെ സ്റ്റാര്‍ ബേസില്‍ അവസാനവട്ട ഒരുക്കങ്ങള്‍ നടത്തുന്നത്. മാര്‍ച്ച്‌ ആറിന് സെന്‍ട്രല്‍ ടൈം വൈകിട്ട് 5.30നാണ് വിക്ഷേപണ വിന്‍ഡോ ആരംഭിക്കുക. സ്റ്റാര്‍ഷിപ്പ് വിക്ഷേപണ പരീക്ഷണം ലോകമെങ്ങും തത്സമയം കാണാനുള്ള അവസരമുണ്ട്.
സ്റ്റാര്‍ഷിപ്പ് സൂപ്പര്‍ ഹെവി റോക്കറ്റിന്‍റെ ലിഫ്റ്റോഫിന് 30 മിനിറ്റ് മുമ്പ് ലൈവ് വെബ്‌കാസ്റ്റ് ആരംഭിക്കും. സ്പേസ് എക്സിന്‍റെ വെബ്‌സൈറ്റും എക്സ് അക്കൗണ്ടും എക്സ് ടിവി ആപ്പും വഴി സ്റ്റാര്‍ഷിപ്പ് എട്ടാം പരീക്ഷണ വിക്ഷേപണം തത്സമയം കാണാം. എക്കാലത്തെയും വലുതും ഭാരമേറിയതും ഭാരം ബഹിരാകാശത്തേക്ക് വഹിക്കുന്നതുമായ റോക്കറ്റാണ് സ്പേസ് എക്സിന്‍റെ സ്റ്റാര്‍ഷിപ്പ്. 121 മീറ്ററാണ് സ്റ്റാര്‍ഷിപ്പ് മെഗാ റോക്കറ്റിന്‍റെ ആകെ ഉയരം. താഴെയുള്ള സൂപ്പർ ഹെവി ബൂസ്റ്റര്‍, മുകളിലെ സ്റ്റാര്‍ഷിപ്പ് സ്പേസ്‌ക്രാഫ്റ്റ് (ഷിപ്പ്) എന്നീ രണ്ട് ഭാഗങ്ങള്‍ ഈ വിക്ഷേപണ വാഹനത്തിനുണ്ട്. സൂപ്പര്‍ ഹെവി ബൂസ്റ്ററിന് മാത്രം 71 മീറ്ററാണ് ഉയരം. 33 റാപ്റ്റര്‍ എഞ്ചിനുകളാണ് സൂപ്പര്‍ ഹെവി ബൂസ്റ്ററിന്‍റെ കരുത്ത്. സൂപ്പർ ഹെവി ബൂസ്റ്ററിന് വലിയ പേലോഡുകള്‍ ബഹിരാകാശത്തേക്ക് ഉയർത്താൻ കഴിയും. 52 മീറ്ററാണ് ഏറ്റവും മുകളിലെ ഷിപ്പ് ഭാഗത്തിന്‍റെ ഉയരം. വിക്ഷേപണത്തിന് ശേഷം സൂപ്പര്‍ ഹെവി ബൂസ്റ്റര്‍ ഭൂമിയിലെ യന്ത്രക്കൈയില്‍ (മെക്കാസില്ല) വായുവില്‍ വച്ച്‌ വിജയകരമായി പിടികൂടാന്‍ ഇതിനകം സ്പേസ് എക്സിനായിട്ടുണ്ട്.
നിങ്ങളുടെ വാട്സപ്പിൽ അതിവേഗം വാർത്തകളറിയാൻ ജാഗ്രതാ ലൈവിനെ പിൻതുടരൂ Whatsapp Group | Telegram Group | Google News | Youtube
സ്റ്റാര്‍ഷിപ്പിന്‍റെ എട്ടാം പരീക്ഷണ വിക്ഷേപണത്തിലും ഹെവി ബൂസ്റ്റര്‍ ഭാഗം മെക്കാസില്ലയില്‍ ലാന്‍ഡ് ചെയ്യിക്കും. ഇതിന് പുറമെ ഷിപ്പ് ഭാഗം ഉപയോഗിച്ച്‌ ഡമ്മി സാറ്റ്‌ലൈറ്റുകള്‍ ബഹിരാകാശത്ത് വിജയകരമായി വിന്യസിക്കുക എന്ന വെല്ലുവിളിയും സ്റ്റാര്‍ഷിപ്പിന്‍റെ എട്ടാം പരീക്ഷണത്തില്‍ സ്പേസ് എക്സിനെ കാത്തിരിക്കുന്നു. സ്റ്റാര്‍ഷിപ്പിന്‍റെ ഏഴാം പരീക്ഷണം ഷിപ്പ് ഭാഗത്തിന്‍റെ പൊട്ടിത്തെറിയില്‍ അവസാനിച്ചതോടെ ഹാര്‍ഡ്‌വെയറിലും മറ്റും ഏറെ മാറ്റങ്ങള്‍ വരുത്തിയാണ് എട്ടാം പരീക്ഷണത്തിന് സ്പേസ് എക്സ് തയ്യാറെടുക്കുന്നത്. വിക്ഷേപണത്തിന് എട്ട് മിനിറ്റുകള്‍ക്ക് ശേഷം മുകളിലെ ഷിപ്പ് ഭാഗം ബഹിരാകാശത്ത് വച്ച്‌ പൊട്ടിത്തെറിക്കുകയായിരുന്നു. ബൂസ്റ്റര്‍, ഷിപ്പ് ഭാഗങ്ങള്‍ പൂര്‍ണമായും പുനരുപയോഗിക്കാന്‍ ലക്ഷ്യമിടുന്ന ബഹിരാകാശ വിക്ഷേപണ വാഹനമായ സ്റ്റാര്‍ഷിപ്പ് ചൊവ്വയിലേക്കും ചന്ദ്രനിലേക്കുമുള്ള യാത്രകള്‍ മനസില്‍ കണ്ടാണ് സ്പേസ് എക്സ് തയ്യാറാക്കുന്നത്.