ഗോലാഘട്ട്: അസ്സമിലെ ഗോലഘട്ടില്‍ ബസ്സും ട്രക്കും കൂട്ടിയിടിച്ച് 12 പേര്‍ മരിച്ചു. അപകടത്തില്‍ 25 പേര്‍ക്ക് പരിക്കേറ്റു. ഇന്ന് പുലര്‍ച്ചെ 5 മണിയോടെ ഗോലാഘട്ടിലെ ഡെറഗോണിലെ ബാലിജൻ മേഖലയിലാണ് സംഭവം നടന്നത്. ടിലിങ്ക മന്തിറിലേക്ക് തീര്‍ത്ഥാടകരുമായി പോകുകയായിരുന്ന ബസ്സാണ് അപകടത്തില്‍ പെട്ടത്. അപകടം നടക്കുമ്പോള്‍ ബസ്സില്‍ 45 യാത്രികര്‍ ഉണ്ടായിരുന്നുവെന്നാണ് വിവരം.
യാത്രാ സംഘം ടിലിങ്ക മന്തിറിലേക്ക് എത്തുന്നതിനു തൊട്ടുമുൻപായാണ് അപകടം സംഭവിച്ചത്. എതിര്‍ ദിശയില്‍ നിന്നും വന്ന ട്രക്കുമായി ബസ് കൂട്ടിയിടിക്കുകയായിരുന്നുവെന്നാണ് വിവരം. അപകടം നടന്നതിന് പിന്നാലെ ഓടിയെത്തിയ നാട്ടുകാരാണ് രക്ഷാപ്രവര്‍ത്തനം നടത്തിയത്. പിന്നാലെ വിവരമറിഞ്ഞ് പൊലിസും ഫയര്‍ഫോഴ്സുമെത്തി. ബസില്‍ നിന്നും 10 മൃതദേഹങ്ങളാണ് പുറത്തെടുത്തത്. ഗുരുതരമായി പരിക്കേറ്റവരെ തൊട്ടടുത്തുള്ള ആശുപത്രികളില്‍ പ്രവേശിപ്പിച്ചിരിക്കുകയാണ്. ഗോലാഘട്ട് എസ്.പി രാജേൻ സിങ് സംഭവസ്ഥലത്തെത്തി സ്ഥിതിഗതികള്‍ വിലയിരുത്തി. അപകടം നടന്നത് എങ്ങനെയാണെന്ന് അന്വേഷിച്ച്‌ വരികയാണെന്നും വിശദമായ അന്വേഷണം നടത്തുമെന്നും എസ്പി അറിയിച്ചു.
