ന്യൂഡൽഹി : സന്തോഷ് ട്രോഫി ഫുട്‌ബോളില്‍ കേരളത്തിന് തോല്‍വി. എതിരില്ലാത്ത രണ്ട് ഗോളുകള്‍ക്ക് ഗോവയാണ് കേരളത്തെ പരാജയപ്പെടുത്തിയത്.മത്സരത്തിന്റെ ഇരുപകുതികളിലുമായിട്ടാണ് ഗോവ ഗോളുകള്‍ നേടിയത്. നെസിയോ ഫെര്‍ണാണ്ടസാണ് രണ്ട് ഗോളുകളും നേടിയത്. ആദ്യ മത്സരത്തില്‍ അസാമിനെ ഒന്നിനെതിരെ മൂന്ന് ഗോളുകള്‍ക്ക് വീഴ്ത്തിയ കേരളം മൂന്ന് പോയിന്റുമായി മൂന്നാം സ്ഥാനത്താണ്. ഗ്രൂപ്പ് എയില്‍ ആറ് പോയിന്റുമായി സര്‍വീസസ് ഒന്നാമതും നാല് പോയിന്റുമായി ഗോവ രണ്ടാമതുമാണ്. മത്സരത്തില്‍ കേരളം മികച്ച നീക്കങ്ങളോടെയാണ് തുടങ്ങിയതെങ്കിലും ദൗര്‍ഭാഗ്യം വില്ലനായി. മൂന്നാം മിനിറ്റില്‍ അബ്ദുറഹീമിന്റെ ഹെഡര്‍ ലക്ഷ്യം കാണുന്നതിന് ഗോള്‍പോസ്റ്റ് വിലങ്ങുതടിയായി. ആദ്യ പകുതിയില്‍ ക്യാപ്റ്റന്‍ നിജോ ഗില്‍ബര്‍ട്ട് പരിക്കേറ്റ് കളം വിട്ടതും കേരളത്തിന് തിരിച്ചടിയായി. ഇരു പകുതികളിലുമായി നിരവധി മികച്ച മുന്നേറ്റങ്ങള്‍ കേരളം നടത്തിയെങ്കിലും ഗോള്‍ മാത്രം അകന്നു നിന്നു.മറ്റു മത്സരത്തില്‍ സര്‍വീസസ് ആതിഥേയരായ അരുണാചല്‍ പ്രദേശിനെ 4-0ന് തകര്‍ത്തു. മേഘാലയക്കെതിരെ 2-1ന് അസം വിജയം കണ്ടു.
