കൊല്ലം : കുണ്ടറയില്‍ പോലീസിന് നേരെ ആക്രമണം. കവലയില്‍ ചിലർ തല്ലുണ്ടാക്കുന്നുവെന്ന പരാതി അന്വേഷിക്കാനെത്തിയ പോലീസ് ഉദ്യോഗസ്ഥർക്കെതിരെയായിരുന്നു നാലംഗ സംഘത്തിന്റെ ആക്രമണം. സംഭവത്തില്‍ നാല് പോലീസ് ഉദ്യോഗസ്ഥർക്ക് പരിക്കേറ്റു. ഞായറാഴ്ച രാത്രി 7.45-ഓടെയാണ് സംഭവം. ഇടവട്ടം പൂജപ്പുര ക്ഷേത്രത്തിനു സമീപം കൂനംവിള ജങ്ഷനിനെ സംഘർഷം അന്വേഷിക്കാനെത്തിയതായിരുന്നു പോലീസ്. എന്നാല്‍, പോലീസിനെ കണ്ടതോടെ സംഘം ഇവർക്കെതിരെ തിരിഞ്ഞു.
സംഭവത്തില്‍ കുണ്ടറ പോലീസ് സ്റ്റേഷനിലെ എസ്.ഐ. എസ്.എൻ.സുജിത്ത്, എ.എസ്.ഐ. എൻ.സുധീന്ദ്രബാബു, സി.പി.ഒ.മാരായ ജോർജ് ജെയിംസ്, എ.സുനില്‍ എന്നിവർക്ക് പരിക്കേറ്റു.
പോലീസിനെ ആക്രമിച്ച നാല് പേരെയും പിടികൂടി പോലീസ് ജീപ്പില്‍ കയറ്റിയിരുന്നു. എന്നാല്‍, ഇതിനിടയില്‍ രണ്ടുപേർ ഓടി രക്ഷപ്പെടുകയായിരുന്നു. പെരിനാട് മംഗലഴികത്തുവീട്ടില്‍ അഭിലാഷ് (31), കുഴിയം ലക്ഷ്മിവിലാസത്തില്‍ ചന്തു നായർ (23) എന്നിവരാണ് പിടിയിലായത്. രക്ഷപ്പെട്ട സാനിഷ്, അരവിന്ദ് എന്നിവർക്കായി പോലീസ് തിരച്ചില്‍ ആരംഭിച്ചു. പരിക്കേറ്റ പോലീസ് ഉദ്യോഗസ്ഥർ കാഞ്ഞിരകോട് താലൂക്ക് ആശുപത്രിയില്‍ ചികിത്സതേടി.
