കാലടി : എറണാകുളം കാലടിയില്‍ സമയത്തെച്ചൊല്ലി തമ്മില്‍ത്തല്ലി ബസ് ജീവനക്കാർ. പെരുമ്പാവൂർ – അങ്കമാലി റൂട്ടില്‍ ഓടുന്ന സെന്റ് തോമസ് ബസിലേയും മൈത്രി ബസിലെയും ജീവനക്കാർ തമ്മിലാണ് കയ്യാങ്കളിയുണ്ടായത്. സെന്റ് തോമസ് ബസില്‍ കയറിയ മൈത്രി ബസിലെ ജീവനക്കാരൻ വാഹനം ഓടിക്കൊണ്ടിരിക്കെ ഡ്രൈവറെ കയ്യേറ്റം ചെയ്തു. പിന്നാലെയാണ് കയ്യേറ്റവും അടിപിടിയും ഉണ്ടായത്. സംഭവത്തില്‍ ബസുടമകള്‍ പൊലീസില്‍ പരാതി നല്‍കിയിട്ടുണ്ട്.
ഫെബ്രുവരി ആദ്യവാരത്തില്‍ കണ്ണൂരില്‍ ബസുകളുടെ മല്‍സര ഓട്ടത്തിന് എതിരെ മോട്ടോർ വാഹന വകുപ്പ് നടപടി എടുത്തിരുന്നു. യാത്രക്കാരുടെ പരാതിയില്‍ ഒരു ബസ് ഡ്രൈവറുടെ ലൈസൻസ് സസ്പെൻഡ് ചെയ്യാൻ എംവിഡി ശുപാർശ നല്‍കിയിരുന്നു.
അപകടകരമായ രീതിയില്‍ വാഹനം ഓടിച്ചത് ചൂണ്ടിക്കാട്ടിയാണ് നടപടി. കണ്ണൂർ, കൂത്തുപറമ്ബ് റൂട്ടില്‍ ഓടുന്ന കുടജാദ്രി, ഖസർമുല്ല എന്നീ പേരുകളുള്ള രണ്ട് സ്വകാര്യ ബസുകള്‍ തമ്മിലായിരുന്നു മല്‍സര ഓട്ടം. കായലോട് , പാനുണ്ട റോഡില്‍ കുടജാദ്രി എന്ന ബസ്സില്‍ നിന്ന് യാത്രക്കാർ ഇറങ്ങുമ്പോള്‍ മറികടക്കാനായി പിന്നാലെ വന്ന ബസ് ഇടത് വശത്ത് കൂടി അപകടകരമായ രീതിയില്‍ ഓടിച്ച്‌ പോവുകയായിരുന്നു. രണ്ട് യാത്രക്കാരും രണ്ട് ബസുകള്‍ക്ക് ഇടയിലാകുന്ന അവസ്ഥയിലായിരുന്നു ഈ മത്സര ഓട്ടം. പിന്നാലെ യാത്രക്കാർ മോട്ടോർ വാഹന വകുപ്പില്‍ പരാതി നല്‍കുകയായിരുന്നു.
