ബംഗളൂരു : ബംഗളൂരുവിലെ കുടിവെള്ള ക്ഷാമത്തില്‍ പ്രതികരണവുമായി കർണാടക ഉപമുഖ്യമന്ത്രി ഡികെ ശിവകുമാർ. എന്തുവില കൊടുത്തും ബംഗളൂരുവിലേക്ക് മതിയായ ജലവിതരണം സർക്കാർ ഉറപ്പാക്കുമെന്ന് ഡികെ ശിവകുമാർ പറഞ്ഞു. ബംഗളൂരുവിലെ എല്ലാ പ്രദേശങ്ങളിലും ജലക്ഷാമം നേരിടുന്നുണ്ടെന്നും തൻ്റെ വീട്ടിലെ കുഴല്‍ക്കിണർ പോലും വറ്റിവരണ്ടെന്നും ഡികെ ശിവകുമാർ പറഞ്ഞു. ഇന്നലെ മാധ്യമങ്ങളോട് സംസാരിക്കുമ്പോഴാണ് ഡികെയുടെ പരാമർശം ഉണ്ടായത്. ബംഗളൂരുവില്‍ കനത്ത വെള്ളക്ഷാമം നേരിടുകയാണ്. എന്നാല്‍ എന്തുവിലകൊടുത്തും നഗരത്തില്‍ ജലവിതരണം ഉറപ്പാക്കുമെന്നും ഡികെ ശിവകുമാർ പറഞ്ഞു.
മഴയില്ലാത്തതിനാല്‍ കുഴല്‍ക്കിണറുകള്‍ വറ്റിയതോടെ ബെംഗളൂരു കടുത്ത വെള്ളക്ഷാമം നേരിടുകയാണ്. വെള്ളം ഉപയോഗിക്കുന്നതില്‍ പൊതുജനം ജാഗ്രത പാലിക്കണമെന്ന് റസിഡൻഷ്യല്‍ സൊസൈറ്റികള്‍ നിർദേശം നല്‍കിയിട്ടുണ്ട്. അതേസമയം, വെള്ളക്ഷാമം മുതലെടുത്ത് നിരവധി സ്വകാര്യ സംഘങ്ങള്‍ രംഗത്തെത്തിയിട്ടുണ്ട്. നിരവധി സ്വകാര്യ വാട്ടർ ടാങ്കറുകള്‍ വെള്ളം എത്തിക്കുന്നതിന് അമിത തുക ഈടാക്കുന്നുണ്ട്. 600 രൂപ മുതല്‍ 3000 രൂപ വരെ ഈടാക്കുന്നുണ്ടെന്നും ശിവകുമാർ പറഞ്ഞു. എന്നാല്‍ ഇത് നിയന്ത്രിക്കുമെന്നും എല്ലാ സ്വകാര്യ വിതരണക്കാരും രജിസ്റ്റർ ചെയ്യണമെന്നും ആവശ്യപ്പെട്ടതായും ഡികെ പറഞ്ഞു. ടാങ്കറുകള്‍ സഞ്ചരിക്കുന്ന ദൂരത്തിൻ്റെ അടിസ്ഥാനത്തിലായിരിക്കും വില നിശ്ചയിക്കുക. അതേസമയം, ബെംഗളൂരുവിലെ ജലക്ഷാമത്തില്‍ കേന്ദ്ര സർക്കാരിനെ ഡികെ ശിവകുമാർ വിമർശിച്ചു. വെള്ള ക്ഷാമം പരിഹരിക്കാൻ കഴിയുന്ന ജല പദ്ധതി കേന്ദ്രം സ്തംഭിപ്പിക്കുകയാണെന്നും ഡികെ പറഞ്ഞു.
