ചെന്നൈ : റുപേ പ്രൈം വോളിബോള്‍ ലീഗില്‍ കാലിക്കറ്റ് ഹീറോസ്-ഡല്‍ഹി തൂഫാൻസ് ഫൈനല്‍. ചെന്നൈ ജവഹർലാല്‍ നെഹ്റു ഇൻഡോർ സ്‌റ്റേഡിയത്തില്‍ ഇന്നലെ നടന്ന എലിമിനേറ്ററില്‍ നിലവിലെ ചാമ്പ്യൻമാരായ അഹമ്മദാബാദ് ഡിഫൻഡേഴ്സിനെ അഞ്ച് സെറ്റ് നീണ്ട ത്രില്ലറില്‍ കീഴടക്കിയാണ് നവാഗതരായ ഡല്‍ഹി ഫൈനലില്‍ കടന്നത്.സ്‌കോർ: 15-9, 10-15, 10-15, 15-12 , 17-15. ലാസർ ഡോഡിച്ച്‌ ആണ് കളിയിലെ താരം.
അമലിന്റെ സൂപ്പർ സെർവിലൂടെ കരുത്തുറ്റ തുടക്കമാണ് ഡല്‍ഹിക്ക് കിട്ടിയത്. മാക്സ് സെനിക്ക, അംഗമുത്തു എന്നിവരുടെ പിഴവുകള്‍ അഹമ്മദാബാദിന് വിനയായി. ഇതിനിടെ സൂപ്പർ പോയിന്റില്‍ ഡല്‍ഹി തുടക്കത്തിലേ ലീഡ് കുറിച്ചു. രണ്ടാം സെറ്റില്‍ തുടർച്ചയായ മികച്ച ബ്ലോക്കുകള്‍ കൊണ്ട് എല്‍.എം മനോജ് അഹമ്മദാബാദിന് തിരിച്ചുവരാനുള്ള വഴിയൊരുക്കി.ആയുഷ് ഡല്‍ഹിക്കായി പോയിന്റുകള്‍ നേടികൊണ്ടിരുന്നു. എന്നാല്‍ സന്തോഷിന്റെ ലക്ഷ്യബോധമില്ലായ്മ അഹമ്മദബാദിന് മത്സരത്തിലേക്ക് തിരിച്ചുവരാൻ അവസരമൊരുക്കി.
നിങ്ങളുടെ വാട്സപ്പിൽ അതിവേഗം വാർത്തകളറിയാൻ ജാഗ്രതാ ലൈവിനെ പിൻതുടരൂ Whatsapp Group | Telegram Group | Google News | Youtube
ആയുഷ് ആ ഘട്ടത്തിലും ഡല്‍ഹിക്കായി നിർണായക പോയിന്റുകള്‍ നേടിക്കൊണ്ടിരുന്നു. മറുവശത്ത് ഷോണ്‍ ടി ജോണ്‍ അഹമ്മദാബാദിന്റെ ആ‌ക്രമണനിരയ്ക്ക് ഊർജം പകർന്നു. പന്ത് ഏറ്റുവാങ്ങുന്നതില്‍ സന്തോഷിന് പിഴവുപറ്റി. ശിഖർ സിങ് തകർപ്പൻ കളി പുറത്തെടുത്തതോടെ അഹമ്മദാബാദ് 2-1ന്റെ ലീഡ് നേടി. നാലാം സെറ്റില്‍ ഡാനിയല്‍ അപോണ്‍സ താളം കണ്ടെത്തിയതോടെ കളി ഉണർന്നു. തകർപ്പൻ ബ്ലോക്ക് കൊണ്ട് അപോണ്‍സ ഡല്‍ഹിയെ അഞ്ചാം സെറ്റിലേക്ക് നയിച്ചു.
പ്രതിരോധ മികവ് കൊണ്ട് ഇരു ടീമുകളും ഒപ്പത്തിനൊപ്പം പോരാടുകയായിരുന്നു അഞ്ചാം സെറ്റില്‍. രോഹിതും ലാസറും അഹമ്മദാബാദ് പ്രതിരോധത്തിലെ വിടവുകള്‍ മനസിലാക്കി ഷോട്ടുകള്‍ തൊടുത്തത് ഡല്‍ഹിക്ക് ഗുണമായി. സെനിക്കയും അംഗമത്തുവും ഡല്‍ഹി പ്രതിരോ രോധത്തെ പരീക്ഷിക്കാൻ തുടങ്ങിയതോടെ കളി ആവേശകരമായി.എന്നാല്‍ പതറാതെ പൊരുതിയ ഡല്‍ഹി തൂഫാൻസ് ആ സെറ്റും മത്സരവും സ്വന്തമാക്കി ഫൈനലിലേക്ക് ടിക്കറ്റ് ഉറപ്പിക്കുകയായിരുന്നു.
ഫൈനല്‍ നാളെ
നാളെ വൈകിട്ട് 6.30നാണ് കാലിക്കറ്റ് ഹീറോസും ഡല്‍ഹി തൂഫാൻസും തമ്മിലുള്ള ഫൈനല്‍. കാലിക്കറ്റ് സൂപ്പർ ഫൈവ് റൗണ്ടിലെ ഒന്നാംസ്ഥാനക്കാരായാണ് ഫൈനലില്‍ കടന്നത്.
