കോട്ടയം : സജി മഞ്ഞക്കടമ്പലിന്റെ ആരോപണങ്ങള്‍ അടിസ്ഥാന വിുദ്ധമെന്ന് മോന്‍സ് ജോസഫ്. കോട്ടയം പ്രസ് ക്ലബ്ബില്‍ സജി മഞ്ഞക്കടമ്പില്‍ ഉന്നയിച്ച ആരോപണങ്ങള്‍ക്ക് മറുപടി പറയുകയായിരുന്നു അദ്ദേഹം. പാര്‍ട്ടി വേദികളില്‍ അദ്ദേഹം ആരോപിച്ച തരത്തിലുള്ള ഒരു പരാതികളും ലഭിച്ചിട്ടില്ല. ഇത് തന്നെ മാത്രം കേന്ദ്രീകരിച്ചുള്ള രാഷ്ട്രീയ പ്രേരിതനീക്കമാണെന്നും അദ്ദേഹം പറഞ്ഞു. വിഷയത്തില്‍ പാര്‍ട്ടി ചെയര്‍മാനെ കാര്യങ്ങള്‍ ധരിപ്പിക്കും പാര്‍ട്ടി തലത്തില്‍ വിഷയം ഗൗരവമായി അന്വേഷിക്കും. ഫ്രാന്‍സിസ് ജോര്‍ജിന് കോട്ടയത്ത് രണ്ട് അപരന്‍മാരെ നിര്‍ത്തി നോമിനേഷന്‍ തള്ളി പോയതിന്റെ ജാള്യത ചിലര്‍ക്കുണ്ട്.
ആ കൂട്ടരാണോ ഇതിന് പിന്നിലുള്ളത് എന്നും അന്വേഷിക്കും. പാര്‍ട്ടിയിലും യുഡിഎഫിലും എല്ലാ തീരുമാനങ്ങളും സുതാര്യമായാണ് എടുക്കുന്നത്. സജിയെ ജില്ലാ പ്രസിഡന്റ് സ്ഥാനത്തേക്ക് കൊണ്ടു വരുന്നതില്‍ തനിക്കും മുഖ്യ പങ്കുണ്ട്. പാര്‍ട്ടിക്ക് വേണ്ടി പണം ഒരുപാട് ചിലവാക്കി എന്ന സജി മഞ്ഞക്കടമ്പന്റെ ആരോപണം അടിസ്ഥാന രഹിതമാണ്. പ്രവര്‍ത്തനങ്ങള്‍ക്കുള്ള ഫണ്ട് പാര്‍ട്ടി നല്‍കാറുണ്ട് ആരുടേയും കുടുംബ സ്വത്ത് പാര്‍ട്ടിക്ക് വേണ്ടി ചിലവഴിക്കേണ്ട സാഹചര്യം ഉണ്ടായിട്ടില്ല. ഇത്തരം ആരോപണങ്ങളെ ആത്മ സംയമനത്തോടെ നേരിടും. പ്രധാന ലക്ഷ്യം ഫ്രാന്‍സിസ് ജോര്‍ജിന്റെ വിജയമാണ.് അതിനായ് യുഡിഎഫ് ഒറ്റ കെട്ടായി നിന്ന് പോരാടുമെന്നു മോന്‍സ് ജോസഫ് കോട്ടയത്ത് മാധ്യമങ്ങളോട് പറഞ്ഞു.
