തെള്ളകത്തു നിന്നും
ജാഗ്രതാ ന്യൂസ് ലൈവ്
പ്രത്യേക ലേഖകൻ
കോട്ടയം: എം.സി റോഡിൽ കാരിത്താസ് ആശുപത്രിയ്ക്കു സമീപം റോഡരികിൽ നിർത്തിയിട്ടിരുന്ന ലോറിയ്ക്കു പിന്നിൽ ബൈക്കിടിച്ച് സ്വകാര്യ ബസ് കണ്ടക്ടർ മരിച്ചു. കോട്ടയം – എറണാകുളം റൂട്ടിൽ സർവീസ് നടത്തുന്ന അവേമരിയ ബസിന്റെ കണ്ടക്ടർ പട്ടിത്താനം സ്വദേശി ഷിബു (ഒബാമ) ശിവനാണ് മരിച്ചത്. ശനിയാഴ്ച രാത്രി പത്തു മണിയോടെ എം.സി റോഡിൽ കാരിത്താസിനു സമീപം റിലയൻസ് പെട്രോൾ പമ്പിനു മുന്നിലായിരുന്നു അപകടം.
നിങ്ങളുടെ വാട്സപ്പിൽ അതിവേഗം വാർത്തകളറിയാൻ ജാഗ്രതാ ലൈവിനെ പിൻതുടരൂ Whatsapp Group | Telegram Group | Google News | Youtube
സ്വകാര്യ ബസിലെ ജീവനക്കാരനായ ഷിബു ജോലി കഴിഞ്ഞ ശേഷം വീട്ടിലേയ്ക്കു മടങ്ങുകയായിരുന്നു. കോട്ടയം ഭാഗത്തു നിന്നും പട്ടിത്താനത്തേയ്ക്കു വരുന്നതിനിടെ കാരിത്താസ് ഭാഗത്തു വച്ച് റോഡരികിൽ പാർക്ക് ചെയ്തിരുന്ന നാഷണൽ പെർമിറ്റ് ലോറിയുടെ പിന്നിൽ ഷിബുവിന്റെ ബൈക്ക് ഇടിക്കുകയായിരുന്നു. ഇടിയുടെ ആഘാതത്തിൽ റോഡിൽ തലയിടിച്ചാണ് ഷിബു വീണത്. ഓടിക്കൂടിയ നാട്ടുകാർ ചേർന്ന് തെള്ളകത്തെ മാതാ ആശുപത്രിയിൽ എത്തിച്ചെങ്കിലും മരണം സംഭവിച്ചിരുന്നു.
റോഡരികിൽ പാർക്ക് ചെയ്തിരുന്ന നാഷണൽ പെർമിറ്റ് ലോറി ഷിബുവിന്റെ കാഴ്ചയിൽ പെടാതിരുന്നതാണ് അപകടത്തിന് കാരണമെന്നാണ് ലഭിക്കുന്ന പ്രാഥമിക വിവരം. ലോറിയുടെ പിന്നിലിടിച്ച് രക്തത്തിൽ കുളിച്ചു കിടന്ന ഷിബുവിനെ ഓടിക്കൂടിയ നാട്ടുകാരാണ് ആശുപത്രിയിൽ എടുത്തത്. അപകടത്തെ തുടർന്നു രക്തം റോഡിൽ തളം കെട്ടി കിടക്കുകയായിരുന്നു. അഗ്നിരക്ഷാ സേനാസംഘം എത്തിയാണ് റോഡിലെ രക്തം കഴുകി നീക്കിയത്. അപകട വിവരം അറിഞ്ഞ് ഏറ്റുമാനൂർ പൊലീസ് സംഘം സ്ഥലത്ത് എത്തി. ലോറി ഡ്രൈവർക്കെതിരെ ഏറ്റുമാനൂർ പൊലീസ് കേസെടുത്തു.
