കുട്ടികളെ ലൈംഗിക ചൂഷണത്തിന് ഇരയാക്കുന്ന 4000 അശ്ലീല വീഡിയോകൾ ടെലഗ്രാമിന് വിറ്റു; ഒരു വീഡിയോയ്ക്ക് ലഭിച്ചിരുന്നത് 3000 മുതൽ 20000 വരെ; പതിനേഴുകാരൻ അറസ്റ്റിൽ

ഖരഗ്പുർ (യുപി): കുട്ടികളെ ലൈംഗിക ചൂഷണത്തിന് ഇരയാക്കുന്ന നാലായിരത്തോളം വരുന്ന അശ്ലീല വീഡിയോകൾ ടെലഗ്രാമിലൂടെ വിറ്റ 17-കാരൻ അറസ്റ്റിൽ. ഉത്തർപ്രദേശിലെ ഖരഗ്പുരിലാണ് സംഭവം. ടെലഗ്രാമിലൂടെ തന്നെയാണ് പ്രതിക്ക് ദൃശ്യങ്ങൾ ലഭിച്ചതെന്ന് പോലീസ് പറഞ്ഞു. ഒരു വീഡിയോക്ക് 3000 രൂപമുതൽ 20000 രൂപവരെയാണ് പ്രതി ഈടാക്കിയിരുന്നത്.

രാജ് എന്ന വിതരണക്കാരനാണ് വീഡിയോകൾ പ്രതിക്ക് അയച്ചുനൽകിയിരുന്നത്. വീഡിയോ വിൽപ്പനയ്ക്ക് പ്രതിക്ക് ഇയാൾ 30 ശതമാനം കമ്മീഷനും നൽകിയിരുന്നതായും പോലീസ് പറഞ്ഞു. ഒരു സന്നദ്ധ സംഘടനയിൽ നിന്ന് ഖരഗ്പുർ സൈബർ പോലീസിന് ലഭിച്ച രഹസ്യവിവരമാണ് പ്രതിയിലേക്ക് നയിച്ചത്. തുടർന്ന് അന്വേഷണം ആരംഭിച്ച ഖരഗ്പുർ പോലീസ് വ്യാഴാഴ്ച പ്രതിയെ പിടികൂടുകയും ഇയാളുടെ മൊബൈൽ ഫോൺ പിടിച്ചെടുക്കുകയുമായിരുന്നു.

ചോദ്യം ചെയ്യലിൽ, വീഡിയോകൾ വിതരണം ചെയ്യാൻ നെക്കോഗ്രാം മൊബൈൽ ആപ്ലിക്കേഷനും ടെലഗ്രാമും ഉപയോഗിച്ചതായി കൗമാരക്കാരൻ സമ്മതിച്ചതായി സീനിയർ പോലീസ് സൂപ്രണ്ട് ഗൗരവ് ഗ്രോവർ പറഞ്ഞു. വീഡിയോയ്ക്ക് കുറഞ്ഞത് 3000 രൂപയാണ് ഈടാക്കിയിരുന്നത്. ചില വീഡിയോകൾക്ക് 20,000 രൂപവരെ വിലയിട്ടിരുന്നു. ആവശ്യക്കാരിൽ നിന്ന് പണം ലഭിച്ച ശേഷം പ്രതി ഇത് വിതരണക്കാരനായ രാജിന് അയക്കുകയായിരുന്നു പതിവ്.

പ്രതിയിൽ നിന്ന് ദൃശ്യങ്ങൾ വാങ്ങിയിട്ടുള്ള ഈ വിതരണ ശൃംഖലയിൽ ഉൾപ്പെട്ട ബാക്കിയുള്ളവരുടെ വിവരങ്ങളും സൈബർ പോലീസ് ശേഖരിച്ചുവരികയാണ്.