തൃശൂർ: തൃശൂരില്‍ റോഡിലെ റോഡിലെ കുഴിയില്‍ വീണ് സ്കൂട്ടർ യാത്രക്കാരന് പരിക്ക്. അയ്യന്തോള്‍ മരുതൂർകളത്തില്‍ സ്വദേശി സന്തോഷ് കെ. മേനോന് (46) ആണ് പരിക്കേറ്റത്. തൃശൂർ പൂങ്കുന്നത്ത് റോഡിലെ കുഴിയില്‍ വീണാണ് അപകടം. വീഴചയുടെ ആഘാതത്തില്‍ സന്തോഷിന്‍റെ പല്ല് കൊഴിഞ്ഞു. താടിയെല്ലിന് പൊട്ടലുണ്ട്. സന്തോഷിനെ തൃശ്ശൂർ അശ്വിനി ആശുപത്രിയില്‍ പ്രവേശിപ്പിച്ച്‌ അടിയന്തിര ശസ്ത്രക്രിയക്ക് വിധേയനാക്കി.
വ്യാഴാഴ്‌ച രാത്രി. 9.30 ഓടെയാണ് സംഭവം. തലയ്ക്ക് മുറിവേറ്റ സന്തോഷിന് പല്ലിനും താടിയെല്ലിനും ഗുരുതര പരിക്കേറ്റിട്ടുണ്ടെന്നാണ് വിവരം. ഏറെ അപകടം നിറഞ്ഞ വഴിയാണ് തൃശൂർ – കുന്നംകുളം റോഡ്. നിറയെ കുഴികളുള്ള റോഡിനൊപ്പം ലോറികളുടെയും ബസുകളുടെയും മരണപാച്ചിലും വലിയ ഭീഷണിയാണ്. യാത്രക്കാർ ജീവൻ കൈയില്‍ പിടിച്ചാണ് ഇതുവഴി യാത്ര ചെയ്യാറ്. ബൈക്കുകളും സ്‌കൂട്ടറുകളും കുഴിയില്‍ വീണ് അപകടം സ്ഥിരമാണ്.രണ്ടാഴ്ച മുമ്ബ് ആറുവരിപ്പാത നിർമ്മാണത്തിന്‍റെ ഭാഗമായി നിർമ്മിച്ചിരുന്ന കുഴിയില്‍ വീണ് ബൈക്ക് യാത്രക്കാരനായ യുവാവ് മരിച്ചിരുന്നു. അഴീക്കോട് സ്വദേശി നിഖില്‍ ആണ് മരിച്ചത്. ചന്തപ്പുര- കോട്ടപ്പുറം ബൈപ്പാസില്‍ ഗൗരിശങ്കർ ജംഗ്ഷന് സമീപമായിരുന്നു അപകടം നടന്നത്. അപകട സാധ്യത അറിയാതെ പോയ ബൈക്ക് യാത്രികൻ കുഴിയില്‍ വീഴുകയായിരുന്നു. എന്നാല്‍, ഇത്രയും വലിയ കുഴിയ്ക്ക് സമീപം യാത്രക്കാർക്ക് വേണ്ടിയുള്ള യാതൊരു മുന്നറിയിപ്പ് സംവിധാനവും ഇല്ലായിരുന്നു.
