ഹൈദരാബാദ്: തെലങ്കാനയിലെ ഡയപ്പർ നിർമാണ ഫാക്ടറില്‍ വൻ തീപിടുത്തം. ചൊവ്വാഴ്ച രാത്രിയാണ് രംഗറെഡ്ഡി ജില്ലയിലെ നന്ദിഗാമ പ്രദേശത്തെ ഫാക്ടറിയില്‍ തീപിടുത്തമുണ്ടായത്. എന്നാല്‍ സംഭവത്തില്‍ ആർക്കും ആളപായമോ പരിക്കുകളോ ഇല്ലെന്ന് അഗ്നിശമന സേന അറിയിച്ചു. അഞ്ച് അഗ്നിശമന സേനാ യൂണിറ്റുകള്‍ ഏറെ പരിശ്രമിച്ചാണ് തീ നിയന്ത്രണ വിധേയമാക്കിയത്.
കാംസണ്‍ ഹെല്‍ത്ത് കെയർ പ്രൈവറ്റ് ലിമിറ്റഡ് എന്ന സ്ഥാപനത്തിലാണ് പുലർച്ചെ ഒരു മണിയോടെ തീപിടുത്തമുണ്ടായത്. തീപിടുത്തത്തില്‍ ഡയപ്പർ നിർമാണ യൂണിറ്റ് പൂർണമായും കത്തി നശിച്ചു. 25-30 കോടി രൂപയുടെ നാശനഷ്ടങ്ങള്‍ ഉണ്ടായതായാണ് അനുമാനം. വിവിധ സ്ഥലങ്ങളില്‍ നിന്ന് അഞ്ച് ഫയർ എഞ്ചിനുകള്‍ സ്ഥലത്തെത്തി. രാവിലെയും തീ പൂർണമായി കെടുത്താനുള്ള നടപടികള്‍ തുടർന്നുകൊണ്ടിരിക്കുകയാണ്. തീപിടുത്തത്തിന്റെ കാരണങ്ങള്‍ കണ്ടെത്താനുള്ള അന്വേഷണവും ആരംഭിച്ചുവെന്ന് ജില്ലാ ഫയർ ഓഫീസർ മുർളി മനോഹർ റെഡ്ഡി പറഞ്ഞു.
