പെര്‍ത്ത്: ഓസ്ട്രേലിയക്കെതിരായ ടെസ്റ്റ് പരമ്പരയിലെ ആദ്യ ടെസ്റ്റിന് 22ന് പെര്‍ത്തില്‍ തുടക്കമാകുമ്പോള്‍ ആരൊക്കെയാകും ഇന്ത്യയുടെ പ്ലേയിംഗ് ഇലവനില്‍ കളിക്കുക എന്ന ആകാംക്ഷയിലാണ് ആരാധകര്‍. ശുഭ്മാന്‍ ഗില്ലിന് പരിക്കേല്‍ക്കുയും ക്യാപ്റ്റന്‍ രോഹിത് ശര്‍മ വിട്ടു നില്‍ക്കുകയും ചെയ്താല്‍ ഇന്ത്യൻ ടീമില്‍ കാര്യമായ അഴിച്ചുപണിതന്നെ വേണ്ടിവരുമെന്നാണ് കരുതുന്നത്.
രോഹിത് ശര്‍മ കളിച്ചില്ലെങ്കില്‍ ഇന്ത്യക്ക് പെര്‍ത്തില്‍ പുതിയ ഓപ്പണറെ കണ്ടെത്തേണ്ടിവരും. ഈ സാഹചര്യത്തില്‍ ഓസ്ട്രേലിയ എക്കെതിരായ അനൗദ്യോഗിക ടെസ്റ്റില്‍ തിളങ്ങിയില്ലെങ്കിലും അഭിമന്യു ഈശ്വരനാകും യശസ്വി ജയ്സ്വാളിനൊപ്പം ഇന്നിംഗ്സ് ഓപ്പണ്‍ ചെയ്യാനുള്ള ചുമതല. ശുഭ്മാന്‍ ഗില്‍ കളിക്കില്ലെന്ന് ഉറപ്പായ സാഹചര്യത്തില്‍ മൂന്നാം നമ്പറില്‍ കെ എല്‍ രാഹുലിന് അവസരം ലഭിക്കാനാണ് സാധ്യത. നാലാം നമ്പറില്‍ വിരാട് കോലി ഇറങ്ങുമ്പോള്‍ അഞ്ചാമനായി റിഷഭ് പന്ത് ക്രീസിലെത്തും.
