കഴിഞ്ഞ അഞ്ച് വര്‍ഷത്തിനിടയില്‍ കേന്ദ്രം പരസ്യങ്ങള്‍ക്കായി ചെലവഴിച്ചത് 3,339.49 കോടി രൂപ. അച്ചടി മാധ്യമങ്ങള്‍ക്ക് 1,736 കോടി രൂപയുടെയും, ഇലക്ട്രോണിക് മാധ്യമങ്ങള്‍ക്ക് 1,569 കോടി രൂപയുടെയും പരസ്യങ്ങള്‍ നിലവില്‍ നല്‍കിയിട്ടുണ്ട്. രാജ്യസഭയില്‍ രേഖാമൂലം നല്‍കിയ മറുപടിയില്‍ വാര്‍ത്താവിതരണ പ്രക്ഷേപണ മന്ത്രി അനുരാഗ് താക്കൂറാണ് ഇക്കാര്യം വ്യക്തമാക്കിയത്.
വര്‍ഷാടിസ്ഥാനത്തിലുള്ള കണക്കുകള്‍ പരിശോധിച്ചാല്‍, 2017-18ല്‍ അച്ചടി മാധ്യമത്തിന് 636.36 കോടിയും ഇലക്ട്രോണിക് മീഡിയയ്ക്ക് 468.92 കോടിയും പരസ്യങ്ങള്‍ക്കായി ചെലവഴിച്ചു. 2018-19ല്‍ അച്ചടി മാധ്യമത്തിന് 429.55 കോടിയും ഇലക്ട്രോണിക് മീഡിയയ്ക്ക് 514.28 കോടിയും, 2019-20ല്‍ അച്ചടി മാധ്യമങ്ങള്‍ക്ക് 295.05 കോടി രൂപയും മാധ്യമങ്ങള്‍ക്ക് 317.11 കോടി രൂപയും, 2020-21ല്‍ അച്ചടിക്കാന്‍ 197.49 കോടി രൂപയും ഇലക്ട്രോണിക്സിന് 167.86 കോടി രൂപയും, 2021-22ല്‍ അച്ചടിക്കാന്‍ 179.04 കോടി രൂപയും ഇലക്ട്രോണിക് മാധ്യമങ്ങള്‍ക്ക് 101.24 കോടി രൂപയും നല്‍കിയിട്ടുണ്ട്.
നിങ്ങളുടെ വാട്സപ്പിൽ അതിവേഗം വാർത്തകളറിയാൻ ജാഗ്രതാ ലൈവിനെ പിൻതുടരൂ Whatsapp Group | Telegram Group | Google News | Youtube
2022-23 സാമ്പത്തിക വര്‍ഷത്തില്‍ ജൂലൈ 12 വരെയുള്ള അച്ചടി മാധ്യമങ്ങള്‍ക്കായി 19.26 കോടിയുടെയും ഇലക്ട്രോണിക് മാധ്യമങ്ങള്‍ക്ക് 13.6 കോടിയുടെയും പരസ്യങ്ങള്‍ കൊടുത്തിട്ടുണ്ട് . അനുരാഗ് താക്കൂര്‍ മന്ത്രാലയം തിരിച്ചുള്ള ചെലവുകളുടെ കണക്കും നല്‍കിയതാണ് . 2017 മുതല്‍ 2022 ജൂലൈ 12 വരെയുള്ള കണക്കുകള്‍ അനുസരിച്ചു 615.07 കോടി രൂപയുമായി ധനമന്ത്രാലയമാണ് പരസ്യങ്ങള്‍ക്കായി പരമാവധി ചെലവഴിച്ചിരിക്കുന്നത് . വാര്‍ത്താവിതരണ പ്രക്ഷേപണ മന്ത്രാലയമാണ് രണ്ടാം സ്ഥാനത്ത്, 506 കോടി. 411 കോടി രൂപ പരസ്യത്തിനായി ചെലവഴിച്ച ആരോഗ്യ മന്ത്രാലയം മൂന്നാം സ്ഥാനത്തുണ്ട് .
പ്രതിരോധ മന്ത്രാലയം 244 കോടിയും,വനിതാ ശിശുക്ഷേമ മന്ത്രാലയം 195 കോടിയും, ഗ്രാമവികസന മന്ത്രാലയം 176 കോടിയും,കൃഷി മന്ത്രാലയം 66.36 കോടിയും പരസ്യങ്ങള്‍ക്കായി ചെലവഴിച്ചിട്ടുണ്ട് . തൊഴില്‍ മന്ത്രാലയവും 42 കോടിയോളം രൂപ ചെലവഴിച്ചു. സെന്‍ട്രല്‍ ബ്യൂറോ ഓഫ് കമ്മ്യൂണിക്കേഷന്‍സ് (സിബിസി) വഴിയാണ് ഈ പരസ്യങ്ങളെല്ലാം നല്‍കിയത്. കോണ്‍ഗ്രസ് എംപി ജി.സി ചന്ദ്രശേഖരാണ് രാജ്യസഭയില്‍ ഈ ചോദ്യങ്ങള്‍ ഉന്നയിച്ചത്.
