ഗുവാഹത്തി : ഇന്ത്യ-ദക്ഷിണാഫ്രിക്ക ടി20 പരമ്പരയിലെ രണ്ടാം മത്സരം നാളെ ഗുവാഹത്തിയില്‍ നടക്കും. മൂന്ന് മത്സര പരമ്പരയിലെ ആദ്യ മത്സരത്തില്‍ എട്ട് വിക്കറ്റിന്റെ ജയം നേടിയ ഇന്ത്യ 1-0ന് പരമ്പരയില്‍ മുന്നിലാണ്.രണ്ടാം ടി20യിലും ജയിച്ച്‌ പരമ്പര സ്വന്തമാക്കാനുറച്ചാവും ഇന്ത്യ ഇറങ്ങുക. ടി20 ലോകകപ്പിന് മുൻപ് ഇന്ത്യ കളിക്കുന്ന അവസാന ടി20 പരമ്പരയാണിത്. അതുകൊണ്ട് തന്നെ പരമ്പര നേടി ആത്മവിശ്വാസത്തോടെ ലോകകപ്പിലേക്ക് പോകാന്‍ ഇന്ത്യക്ക് ജയം അനിവാര്യമാകും.
ആദ്യ മത്സരത്തില്‍ ഇന്ത്യന്‍ ടീം ഗംഭീര പ്രകടനമാണ് കാഴ്ചവെച്ചത്. 9 റണ്‍സിനിടെ ദക്ഷിണാഫ്രിക്കയുടെ അഞ്ച് വിക്കറ്റുകള്‍ വീഴ്ത്തി. ബാറ്റിങ്ങില്‍ കെ എല്‍ രാഹുലും സൂര്യകുമാര്‍ യാദവും ഫിഫ്റ്റി നേടിയും തിളങ്ങി. രണ്ടാം മത്സരത്തിനിറങ്ങുമ്പോള്‍ ഇന്ത്യ പ്ലേയിങ് 11 മാറ്റം വരുത്തുമോ എന്നാണ് ആരാധകർ ഉറ്റുനോക്കുന്നത്. ബോളർമാർ ഫോമിലേക്ക് ഉയർന്നത് ടീമിൽ ആശ്വാസം പകരുന്നുണ്ട്.
