‘കാന്താരാ’ ഹിന്ദി പതിപ്പും പണം തൂത്തുവാരുന്നു

കെജിഎഫിനു ശേഷം കന്നഡ സിനിമയിൽ നിന്ന് പല ചിത്രങ്ങളും ഭാഷാതീതമായ റീച്ച് നേടിയിരുന്നു. വിക്രാന്ത് റോണ, ചാർലി 777 എന്നിവയ്ക്കു ശേഷം മറ്റൊരു ചിത്രവും അത്തരത്തിൽ പാൻ ഇന്ത്യൻ ശ്രദ്ധ നേടുകയാണ്. റിഷഭ് ഷെട്ടി രചനയും സംവിധാനവും നിർവ്വഹിച്ചിരിക്കുന്ന കാന്താരായാണ് ആ ചിത്രം.

കന്നഡ പതിപ്പിന് വൻ പ്രേക്ഷക സ്വീകാര്യത ലഭിച്ചതിനു പിന്നാലെ മറ്റു ഭാഷാ പതിപ്പുകളും തിയറ്ററുകളിൽ റിലീസ് ചെയ്‍തിരുന്നു. അവയ്ക്കൊക്കെയും മികച്ച പ്രതികരണവുമാണ് ലഭിക്കുന്നത്. ഇപ്പോഴിതാ ചിത്രത്തിൻറെ ഹിന്ദി പതിപ്പ് ഒരു വാരം കൊണ്ട് നേടിയ കളക്ഷൻ സംബന്ധിച്ച കണക്കുകൾ പുറത്തെത്തിയിരിക്കുകയാണ്. റിലീസ് ദിനമായ കഴിഞ്ഞ വെള്ളിയാഴ്ച 1.27 ഓപണിംഗുമായി തുടങ്ങിയ ഹിന്ദി പതിപ്പ് ഇതുവരെ നേടിയിരിക്കുന്നത് 15 കോടിയാണ്. കഴിഞ്ഞ ഞായറാഴ്ചയായിരുന്നു ഏറ്റവുമധികം കളക്ഷൻ. 3.50 കോടി. പ്രമുഖ ട്രേഡ് അനലിസ്റ്റ് തരൺ ആദർശിൻറെ കണക്കാണ് ഇത്.

ആക്ഷൻ ത്രില്ലർ വിഭാഗത്തിൽ പെടുന്ന ചിത്രത്തിന്റെ ഒറിജിനൽ കന്നഡ പതിപ്പ് തിയറ്ററുകളിലെത്തിയത് സെപ്റ്റംബർ 30 ന് ആയിരുന്നു. കെജിഎഫ് നിർമ്മാതാക്കളായ ഹൊംബാളെ ഫിലിംസ് നിർമ്മിച്ച ചിത്രത്തിന് സ്ക്രീനുകൾ കുറവെങ്കിലും പാൻ ഇന്ത്യൻ റിലീസ് ഉണ്ടായിരുന്നു. ആദ്യ 11 ദിനങ്ങളിൽ നിന്ന് 60 കോടി നേടിയ ചിത്രം കർണാടകത്തിന് പുറത്തും മികച്ച അഭിപ്രായം നേടിയിരുന്നു. ഇതേത്തുടർന്നാണ് ചിത്രത്തിൻറെ മൊഴിമാറ്റ പതിപ്പുകൾ പുറത്തിറക്കാൻ നിർമ്മാതാക്കൾ തീരുമാനിച്ചത്. ഇതുപ്രകാരം തെലുങ്ക്, ഹിന്ദി, തമിഴ് പതിപ്പുകൾ കഴിഞ്ഞ വാരാന്ത്യം തിയറ്ററുകളിലെത്തി.

പൃഥ്വിരാജ് പ്രൊഡക്ഷൻസ് ആണ് ചിത്രം കേരളത്തിൽ എത്തിക്കുന്നത്. റിഷഭ് ഷെട്ടി തന്നെ നായകനുമാവുന്ന ചിത്രത്തിൽ സപ്‍തമി ഗൌഡ, കിഷോർ, അച്യുത് കുമാർ, പ്രമോദ് ഷെട്ടി, ഷനിൽ ഗുരു, പ്രകാശ് തുമിനാട്, മാനസി സുധീർ, നവീൻ ഡി പടീൽ, സ്വരാജ് ഷെട്ടി, ദീപക് റായ് പനാജി, പ്രദീപ് ഷെട്ടി, രക്ഷിത് രാമചന്ദ്രൻ ഷെട്ടി, പുഷ്‍പരാജ് ബൊല്ലാറ തുടങ്ങിയവരാണ് മറ്റു പ്രധാന കഥാപാത്രങ്ങളെ അവതരിപ്പിക്കുന്നത്.