മാസ് ലുക്കിൽ മമ്മൂട്ടി…ക്രിസ്റ്റഫറിന്റെ പോസ്റ്ററിന് ലൈക്കിന്റെ പെരുമഴ

കൊച്ചി: റോഷാക്കിന്റെ വൻ വിജയത്തിനു പിന്നാലെ പുതിയ ചിത്രത്തിന്റെ മാസ് ലുക്ക് പോസ്റ്റർ ഫേസ്ബുക്ക് പേജിലൂടെ പുറത്ത് വിട്ട് മെഗാസ്്റ്റാർ മമ്മൂട്ടി.

മമ്മൂട്ടി- ബി. ഉണ്ണികൃഷ്ണൻ കൂട്ടുകെട്ടിലൊരുങ്ങുന്ന ക്രിസ്റ്റഫർ എന്ന ചിത്രത്തിന്റെ പോസ്റ്ററാണ് ദീപാവലി ദിനത്തിൽ താരം പങ്കുവെച്ചത്. നാല് മണിക്കൂർ കൊണ്ട് നാലു ലക്ഷത്തിനടുത്ത് ആളുകളാണ് പോസ്റ്റ് ലൈക്കുകൊണ്ട് പൊതിഞ്ഞത്.

തോക്ക് ചൂണ്ടിയ ഫോട്ടോയാണ് മമ്മൂട്ടി സോഷ്യൽ മീഡിയയിൽ പോസ്റ്റ് ചെയ്തിരിക്കുന്നത്. ടീം ക്രിസ്റ്റഫർ മൂവി വിഷിങ്ങ് യൂ ഓൾ ഹാപ്പി ദീവാലിയെന്നാണ് പോസ്റ്റിന്റെ കൂടെ മമ്മൂട്ടി കുറിച്ചത്.

മമ്മൂട്ടി പൊലീസ് വേഷത്തിലെത്തുന്ന ചിത്രത്തിൽ സ്നേഹ, അമലപോൾ, ഐശ്വര്യ ലക്ഷ്മി എന്നിങ്ങനെ മൂന്ന് നായികമാരുണ്ട്. തെന്നിന്ത്യൻ താരം വിനയ് റായ് ആണ് ചിത്രത്തിലെ വില്ലൻ. വിനയ് റായ് അഭിനയിക്കുന്ന ആദ്യ മലയാള ചിത്രം കൂടിയാണിത്.

ത്രില്ലർ വിഭാഗത്തിലൊരുങ്ങുന്ന ചിത്രത്തിന്റെ പോസ്റ്ററുകളെല്ലാം ആക്ഷൻ ചിത്രം എന്ന പ്രതീതി തരുന്നവയാണ്. മോഹൻ ലാൽ ചിത്രമായ ആറാട്ടിന് ശേഷം ബി. ഉണ്ണികൃഷ്ണൻ സംവിധാനവും ഉദയ് കൃഷ്ണ തിരക്കഥയും നിർവഹിക്കുന്ന ചിത്രമാണ് ക്രിസ്റ്റഫർ.

ഷൈൻ ടോം ചാക്കോ, ദിലീഷ് പോത്തൻ, സിദ്ദീഖ്, ജിനു എബ്രഹാം തുടങ്ങിയവരാണ് മറ്റ് പ്രധാനകഥാപാത്രങ്ങൾ.

എറണാകുളം, വണ്ടിപെരിയാർ എന്നിവിടങ്ങളാണ് ചിത്രത്തിന്റെ പ്രധാന ലൊക്കേഷൻ. ഓപ്പറേഷൻ ജാവ ഒരുക്കിയ ഫൈസ് സിദ്ധിക്ക് ആണ് ഛായാഗ്രഹണം.