അജിത്ത് നായകനാകുന്ന പുതിയ ചിത്രം ‘തുനിവ്’ പൊങ്കൽ റിലീസിന് തയ്യാറെടുക്കുകയാണ്. എച്ച് വിനോദ് സംവിധാനം ചെയ്യുന്ന ചിത്രത്തിന്റെ ഡബ്ബിംഗ് ജോലികൾ അജിത്ത് അടുത്തിടെ പൂർത്തിയാക്കിയിരുന്നു. എച്ച് വിനോദ് തന്നെയാണ് ചിത്രത്തിന്റെ തിരക്കഥയും എഴുതുന്നത്. വിഘ്‍നേശ് ശിവനും അജിത്തും ആദ്യമായി ഒന്നിക്കുന്ന ചിത്രത്തിനെ കുറിച്ചാണ് പുതിയ റിപ്പോർട്ട്. ‘എകെ 62’ എന്നാണ് ചിത്രത്തിന് താൽക്കാലികമായി പേരിട്ടിരിക്കുന്നത്. 2023 ജനുവരിയിൽ ചിത്രം ചിത്രീകരണം തുടങ്ങുമെന്നാണ് റിപ്പോർട്ട്. തൃഷ ആണ് ചിത്രത്തിൽ നായികയാകുക എന്നും വാർത്തകൾ വരുന്നു. ലൈക്ക പ്രൊഡക്ഷൻസ് നിർമിക്കുന്ന ചിത്രത്തിന്റെ സംഗീത സംവിധായകൻ അനിരുദ്ധ് രവിചന്ദെർ ആണ്.
ആരാധകർ ഏറെ പ്രതീക്ഷയോടെ കാത്തിരിക്കുന്ന ചിത്രമായ ‘തുനിവി’ന് വൻ സ്‍ക്രീൻ കൗണ്ടായിരിക്കും എന്ന് റിപ്പോർട്ടുകളുണ്ട്. തിയറ്റർ റിലീസിന് ശേഷം നെറ്റ്‍ഫ്ലിക്സിലായിരിക്കും ‘തുനിവ്’. നിരവ് ഷാ ആണ് ചിത്രത്തിന്റെ ഛായാഗ്രാഹണം നിർവഹിക്കുന്നത്. വിജയ് വേലുക്കുട്ടിയാണ് ചിത്രസംയോജനം നിർവഹിക്കുക. ദേശീയ അവാർഡ് ജേതാവ് സുധ കൊങ്ങര പ്രസാദ് സംവിധാനം ചെയ്യുന്ന ചിത്രത്തിലും അജിത്ത് നായകനായേക്കുമെന്ന് റിപ്പോർട്ടുണ്ട്. സംവിധായകൻ ശ്രീ ഗണേഷ് അജിത്തുമായി പുതിയ സിനിമ സംബന്ധിച്ച് ചർച്ചകളിലാണെന്ന വാർത്തയും ആരാധകർക്കിടയിൽ പ്രചരിക്കുന്നുണ്ട്. ‘കുരുതി ആട്ട’ത്തിന്റെ സംവിധായകനാണ് ശ്രീ ഗണേഷ്.
നിങ്ങളുടെ വാട്സപ്പിൽ അതിവേഗം വാർത്തകളറിയാൻ ജാഗ്രതാ ലൈവിനെ പിൻതുടരൂ Whatsapp Group | Telegram Group | Google News | Youtube
മിസ്‍കിന്റെ സഹസംവിധായകനായിരുന്നു ശ്രീ ഗണേഷ്. ‘തോട്ടക്കൾ’ ആണ് ശ്രീ ഗണേഷിന്റെ ആദ്യത്തെ ചിത്രം. 2017ലാണ് ആദ്യ ചിത്രം പുറത്തിറങ്ങിയത്. ശ്രീ ഗണേഷിന്റെ രണ്ടാമത്തെ ചിത്രം അടുത്തിടെ പുറത്തിറങ്ങിയ ‘കുരുതി ആട്ടം’ ആണ്. അഥർവ നായകനായ ചിത്രത്തിൽ നിരവധി അജിത്ത് റെഫറൻസുകളുമുണ്ട്. അതിനാൽ അജിത്തും ശ്രീ ഗണേഷും ഒന്നിക്കുന്ന വാർത്തയ്‍ക്ക് വലിയ പ്രചാരം ലഭിച്ചിരിക്കുകയാണ്. എന്തായാലും അജിത്തിന്റെ സിനിമകളുടെ അപ്‍ഡേറ്റിനായി കാത്തിരിക്കുകയാണ് ആരാധകർ.
