മുവി ഡെസ്ക്ക് : വരനെ ആവശ്യമുണ്ട്’ എന്ന ചിത്രത്തിന് ശേഷം അനൂപ് സത്യന്‍ സംവിധാനം ചെയ്യുന്ന പുതിയ ചിത്രത്തില്‍ മോഹന്‍ലാല്‍ നായകനായി എത്തുന്നു. ആരാധകര്‍ക്കിടയില്‍ പുതിയ ചിത്രത്തിന്റെ വിശേഷങ്ങള്‍ ചര്‍ച്ചയാകുമ്പോഴും അഭിനേതാക്കളെക്കുറിച്ചുള്ള റിപ്പോര്‍ട്ടുകളാണ് സമൂഹ മാധ്യമങ്ങളില്‍ വൈറലാകുന്നത്. ചിത്രത്തില്‍ ശോഭനയായിരിക്കും നായിക കഥാപാത്രത്തെ അവതരിപ്പിക്കുക എന്നാണ് റിപ്പോര്‍ട്ട്.
മോഹന്‍ലാലിനൊപ്പം നിരവധി ഹിറ്റ് ചിത്രങ്ങളില്‍ ജോഡിയായിട്ടുള്ള ശോഭന വീണ്ടും നായികയാകും എന്ന വാര്‍ത്ത ആരാധകരില്‍ ഏറെ ആവേശമുണ്ടാക്കുന്നുണ്ട്. 2009-ല്‍ അമല്‍ നീരദിന്റെ സംവിധാനത്തില്‍ ഒരുങ്ങിയ ‘സാഗര്‍ എലിയാസ് ജാക്കി റീലോഡഡ്’ എന്ന സിനിമയിലാണ് ഇരുവരും അവസാനമായി ഒന്നിച്ച്‌ അഭിനയിച്ചത്.അതേസമയം, ‘റാം’, ‘എമ്ബുരാന്‍’ എന്നീ സിനിമകളും മോഹന്‍ലാലിന്റേതായി അണിയറയില്‍ ഒരുങ്ങുന്നു. ഈ സിനിമകള്‍ക്ക് ശേഷമായിരിക്കും അനൂപ് സത്യന്റെ ചിത്രം ആരംഭിക്കുക. ആശിര്‍വാദ് സിനിമാസിന്റെ ബാനറില്‍ ആന്റണി പെരുമ്ബാവൂരായിരിക്കും ചിത്രം നിര്‍മ്മിക്കുക.
