കൊല്ലം: കൊല്ലം കടയ്ക്കലില്‍ മോഷ്ടിച്ച ബൈക്കുമായി കടന്നുകളഞ്ഞ പ്രതിയെ കുടുക്കി വാഹനാപകടം. ബൈക്ക് കിളിമാനൂരില്‍ നിയന്ത്രണം വിട്ട് മറിഞ്ഞതോടെയാണ് ചടയമംഗലം സ്വദേശി വിനീഷ് പൊലീസിന്റെ പിടിയിലായത്. ഇന്നലെ ഉച്ചക്ക് പത്രണ്ടേമുക്കാലോടെ മുരുക്കുമൻ സ്വദേശി സൈഫ് കടയ്ക്കല്‍ പഞ്ചായത്തിന്റെ പാർക്കിങ് ഏരിയയിലെ ബൈക്ക് പാർക്ക് ചെയ്ത് കടയ്ക്കല്‍ താലൂക്ക് ആശുപത്രിയില്‍ പോയി മടങ്ങി എത്തുന്നതിനിടെയായിരുന്നു മോഷണം. തുട‍ർന്ന് സൈഫ് കടയ്ക്കല്‍ പൊലീസില്‍ പരാതി നല്‍കി.
സിസിടിവി അരിച്ചുപെറുക്കി പൊലീസ് പരിശോധന നടത്തി. അങ്ങനെ പ്രതി വിനീഷാണെന്ന് പൊലീസ് കണ്ടെത്തി. ഇതിനിടെയിലാണ് കിളിമാനൂർ പൊലീസ് സ്റ്റേഷനു സമീപം മോഷ്ടിച്ച ബൈക്കുമായി വിനീഷ് അപകടത്തില്‍പ്പെട്ടത്. പൊലീസ് എത്തി പരിശോധിച്ചപ്പോള്‍ മോഷ്ടിച്ച ബൈക്കാണെന്ന് മനസിലായി. ചോദ്യം ചെയ്യലില്‍ വിനീഷ് കുറ്റം സമ്മതിച്ചു. കടയ്ക്കല്‍ താലൂകാശുപത്രിയിലെത്തിച്ച വിനീഷിന് നിസ്സാര പരിക്ക് മാത്രമേയുള്ളൂ. ബൈക്ക് പൊലീസ് കസ്റ്റഡിയിലെടുത്തു. നിരവധി മേഷണ കേസിലെ പ്രതിയാണ് വിനീഷ്.
