കോട്ടയം : ആദ്യവർഷ ബിരുദകോഴ്സിന്റെ രണ്ടാം സെമസ്റ്റർ പരീക്ഷാഫലം സാമൂഹികമാധ്യമങ്ങളിൽ പങ്കുവെച്ച് നടി മീനാക്ഷി. ബിഎ ഇംഗ്ലീഷ് ലിറ്ററേച്ചറിന്റെ മാർക്ക് ലിസ്റ്റാണ് താരം ഫെയ്‌സ്ബുക്കിൽ പങ്കുവെച്ചത്.മഹാത്മാഗാന്ധി സർവകലാശാലയ്ക്കുകീഴിലെ മണർക്കാട് സെന്റ് മേരീസ് കോളേജ് വിദ്യാർഥിയാണ് മീനാക്ഷി. അനൂപ്- രമ്യ ദമ്ബതിമാരുടെ മകളായ മീനാക്ഷിയുടെ ശരിയായ പേര് അനുനയ അനൂപ് എന്നാണ്. ഈ പേരാണ് മാർക്ക് ലിസ്റ്റിലുള്ളത്. ആറുപേപ്പറുകളാണ് രണ്ടാംസെമസ്റ്ററില്‍ ഉണ്ടായിരുന്നത്. എല്ലാ വിഷയങ്ങളിലും പാസായ മീനാക്ഷി രണ്ടുവിഷയങ്ങളില്‍ എ പ്ലസ് നേടി. ഒരു എ ഗ്രേഡും രണ്ട് ബി പ്ലസും ഒരു ബി ഗ്രേഡും താരം നേടിയിട്ടുണ്ട്.
പിതാവ് പഠിച്ച കോളേജില്‍ തന്നെ ബിരുദപഠനത്തിന് ചേർന്നതിന്റെ സന്തോഷം മീനാക്ഷി നേരത്തെ പങ്കുവെച്ചിരുന്നു. 1992- 94 കാലത്ത് മണർകാട് സെന്റ് മേരീസ് കോളേജില്‍ അച്ഛൻ അനൂപ് പ്രീഡിഗ്രി വിദ്യാർഥിയായിരുന്നു. ളാക്കാട്ടൂർ എംജിഎംഎൻഎസ്‌എസ് ഹയർ സെക്കൻഡറി സ്കൂളിലായിരുന്നു മീനാക്ഷി പ്ലസ് ടു പഠിച്ചത്. പ്ലസ് ടുവിന് 80 ശതമാനം മാർക്ക് നേടിയാണ് പാസായത്. കോട്ടയം കിടങ്ങൂർ എൻഎസ്‌എസ് ഹയർ സെക്കൻഡറി സ്കൂളില്‍നിന്ന് ഒൻപത് എ പ്ലസും ഒരു എ ഗ്രേഡും സ്വന്തമാക്കിയായിരുന്നു പത്താംക്ലാസ് വിജയം.