കേരളക്കരയെ ഒന്നാകെ ഞെട്ടിച്ച ദുരന്തമാണ് വയനാട്ടില്‍ നടന്നിരിക്കുന്നത്. ഇതിനോടകം 150ലേറെ ആള്‍ക്കാരുടെ മൃതദേഹങ്ങളാണ് കണ്ടെത്തി കഴിഞ്ഞത്. നിരവധി പേർ മണ്ണിനടിയില്‍ പെട്ട് കിടക്കുകയാണ്. രക്ഷപ്പെടുത്തിയ നിരവധി പേർ ആശുപത്രികളിലും ക്യാമ്പുകളിലുമായി കഴിയുന്നുമുണ്ട്. ഇവർക്ക് വേണ്ടിയുള്ള അവശ്യസാധനങ്ങള്‍ സംസ്ഥാനത്തിന്റെ വിവിധ ഭാഗങ്ങളില്‍ നിന്നും എത്തുകയാണ്. ഇതിന്റെ ദൃശ്യങ്ങളും സോഷ്യല്‍ ലോകത്ത് ശ്രദ്ധനേടുന്നുണ്ട്. അത്തരത്തില്‍ നടി നിഖില വിമലിന്റെ ഒരു വീഡിയോയും പുറത്തുവരികയാണ്.
അവശ്യ സാധനങ്ങള്‍ ശേഖരിക്കുന്ന കളക്ഷൻ സെന്ററില്‍ സജീവമായി പ്രവർത്തിക്കുന്ന നിഖിലയുടെ വീഡിയോയാണ് പുറത്തുവന്നിരിക്കുന്നത്. തളിപ്പറമ്പ് കളക്ഷൻ സെന്ററിലാണ് രാത്രി ഏറെ വൈകിയും സന്നദ്ധപ്രവർത്തകർക്കൊപ്പം നടി നിന്നത്. നിഖിലയ്ക്ക് ഒപ്പം ഒട്ടനവധി യുവതി-യുവാക്കളും സജീവമായി തന്നെ പ്രവർത്തിക്കുന്നുമുണ്ട്. സിനിമാ മേഖലയില്‍ ഉള്ള നിരവധി പേരാണ് ഉരുള്‍പൊട്ടലില്‍ ജീവൻ പൊലിഞ്ഞവർക്ക് ആദരാഞ്ജലികള്‍ അറിയിച്ച്‌ കൊണ്ട് രംഗത്ത് എത്തുന്നത്.
