കൊച്ചി: ആലുവയില്‍ എക്സൈസിന്‍റെ മയക്കുമരുന്ന് വേട്ട. ആലുവയിലെ ഫൈവ് സ്റ്റാർ ബാർ ഹോട്ടലില്‍ നിന്നും ന്യൂജനറേഷൻ മയക്കുമരുന്നുമായി നാല് പേരെ അറസ്റ്റ് ചെയ്തു. ആലുവ അത്താണിയില്‍ പ്രവർത്തിക്കുന്ന ഫൈവ് സ്റ്റാർ ബാർ ഹോട്ടലില്‍ എക്സൈസ് നടത്തിയ റെയ്‌ഡിലാണ് എംഡിഎംഎ ടാബ്‌ലറ്റ്, കഞ്ചാവ്, ഹാഷിഷ് ഓയില്‍ എന്നിവയുമായി ഒരു യുവതിയുള്‍പ്പടെ നാല് പേരെ എക്സൈസ് അററ്റ് ചെയ്ത്തത്. കലൂർ സ്വദേശി ജീന ദേവ്, പള്ളുരുത്തി സ്വദേശി അരുണ്‍ സി കിഷോർ, കൊല്ലം സ്വദേശിനി സൂചിമോള്‍ എന്നിവരാണ് പിടിയിലായത്. എക്സൈസ് വാഹന പരിശോധനയില്‍ ഒരു യുവാവ് മയക്കുമരുന്നുമായി പിടിയിലായതോടെയാണ് ഫൈവ് സ്റ്റാർ ഹോട്ടലില്‍ കഴിയുകയായിരുന്ന മറ്റ് നാല് പേരെ എക്സൈസ് പൊക്കിയത്.
വാഹന പരിശോധനയ്ക്കിടെ പള്ളുരുത്തി സ്വദേശി മുഹമ്മദ് ഹയാസിന്‍റെ മാരുതി ഇഗ്നീസ് കാറില്‍ നിന്നും 2.1 05 ഗ്രാം വരുന്ന എംഡിഎംഎ ടാബ്‌ലറ്റുകള്‍ എക്സൈസ് പിടികൂടി. ഇയാളില്‍ നിന്നും ലഭിച്ച വിവരത്തിന്‍റെ അടിസ്ഥാനത്തിലാണ് എക്സൈസ് സംഘം ഹോട്ടലില്‍ എത്തിയത്. പ്രതികള്‍ താമസിക്കുന്ന ഹോട്ടല്‍ മുറിയില്‍ എക്സൈസ് സംഘം മിന്നല്‍ പരിശോധന നടത്തുകയായിരുന്നു. പരിശോധനയില്‍ ഇവരില്‍ നിന്ന് കഞ്ചാവ്, ഹാഷിഷ് ഓയില്‍ എന്നിവ കസ്റ്റഡിയിലെടുത്തു. ഇതോടെ പ്രതികളെ എക്സൈസ് അറസ്റ്റ് ചെയ്തു. ഇവരെ വിശദമായി ചോദ്യം ചെയ്തുവരികയാണെന്നും മയക്കുമരുന്ന് ലഭിച്ചത് എവിടെ നിന്നാണെന്നതടക്കം അന്വേഷിച്ച്‌ വരികയാണെന്ന് എക്സൈസ് അറിയിച്ചു. പരിശോധനയില്‍ എറണാകുളം എക്സൈസ് സ്‌പെഷ്യല്‍ സ്‌ക്വാഡ് ഇൻസ്പെക്ടർ പ്രമോദ്, പ്രിവന്‍റീവ് ഓഫീസർ ജിനീഷ് കുമാർ, ബസന്തകുമാർ, മനോജ്, അഭിജിത്ത് മോഹൻ, വനിതാ ഓഫീസർമാരായ സരിത റാണി, നിഷ എന്നിവർ പങ്കെടുത്തു.
