കൊല്ലം : കൊല്ലത്ത് ഔദ്യോഗിക ആവശ്യത്തിനെത്തിയ അഭിഭാഷകയെ അപമാനിക്കാൻ ശ്രമിച്ചെന്ന പരാതിയില്‍ അഭിഭാഷകനും സിപിഎം നേതാവുമായ ഇ. ഷാനവാസ്ഖാനെതിരെ കേസെടുത്തു. സ്ത്രീത്വത്തെ അപമാനിച്ചതിനടക്കമാണ് കേസ്. അഭിഭാഷകൻ വീട്ടിലേക്ക് വിളിച്ചുവരുത്തി കടന്നു പിടിച്ചെന്നാണ് യുവതിയുടെ പരാതി. നോട്ടറി അറ്റസ്റ്റേഷനുമായി ബന്ധപ്പെട്ട് യുവതിയും സഹപ്രവർത്തകനും കൊല്ലത്തെ മുതിർന്ന അഭിഭാഷകനും സിപിഎം നേതാവുമായ ഷാനവാസ് ഖാന്റെ ഓഫീസില്‍ എത്തി. തുടർന്ന് വിവരങ്ങള്‍ പറഞ്ഞു മടങ്ങി. ശേഷം ഷാനവാസ് ഖാൻ വീട്ടിലേക്ക് വിളിച്ചു വരുത്തി കടന്നുപിടിച്ചെന്നാണ് അഭിഭാഷകയായ യുവതിയുടെ പരാതി.
സംഭവം കേസിലേക്ക് നീങ്ങുമെന്ന് മനസിലാക്കിയ അഭിഭാഷകൻ തന്നെ വിളിച്ച്‌ മാപ്പ് ചോദിച്ചെന്നും യുവതി പറയുന്നു. ഇതിന് തെളിവായി ഫോണ്‍ സംഭാഷണവും പുറത്തുവിട്ടു. ബാർ അസോസിയേഷന് പരാതി നല്‍കിയതിന് പിന്നാലെ ഒത്തുതീർപ്പ് ശ്രമം നടന്നു. പരസ്യമായി മാപ്പു പറയണമെന്ന ആവശ്യം അംഗീകരിക്കാതെ വന്നതോടെയാണ് യുവതി പൊലീസില്‍ പരാതി നല്‍കിയത്. കൊല്ലം വെസ്റ്റ് പോലീസ് ഷാനവാസ് ഖാനെതിരെ കേസെടുത്തിട്ടുണ്ട്.
