റിയാദ്: സൗദി പ്രോ ലീഗില്‍ കരുത്തരായ അല്‍ഷാദാബിനെതിരായ വാശിയേറിയ മത്സരത്തിനു പിന്നാലെ അല്‍നസ്ര്‍ ആരാധകരെ ഞെട്ടിച്ച് സൂപ്പര്‍ താരം ക്രിസ്റ്റ്യാനോ റൊണാള്‍ഡോ. പതിവ് ‘സിയൂ’ ആഘോഷത്തിനുമുൻപ് ‘സുജൂദി’ല്‍ വീണായിരുന്നു താരത്തിന്റെ ആഹ്ലാദപ്രകടനം. മക്കയിലെ വിശുദ്ധ ഗേഹമായ കഅ്ബയിലേക്ക് തിരിഞ്ഞ് ടീമിലെ മുസ്‌ലിം സഹതാരങ്ങള്‍ സാധാരണ നടത്താറുള്ള സാഷ്ടാംഗ പ്രണാമം അനുകരിക്കുകയായിരുന്നു ക്രിസ്റ്റ്യാനോ.
മത്സരത്തില്‍ 2-2ന് തുല്യനിലയില്‍ നിന്ന ശേഷമായിരുന്നു ക്രിസ്റ്റ്യാനോ 59-ാം മിനിറ്റില്‍ നസ്‌റിന് ലീഡ് നേടിക്കൊടുത്തത്. ഇതിനു പിറകെയാണ് സഹതാരങ്ങളെയും ആരാധകരെയും ഞെട്ടിച്ച് താരം സുജൂദില്‍ വീണത്. ശേഷം ട്രേഡ് മാര്‍ക്കായ ‘സിയൂ’ ആഘോഷവും നടത്തി ക്രിസ്റ്റ്യാനോ. സൂപ്പര്‍ താരത്തിന്റെ ഗോളില്‍ അല്‍നസ്ര്‍ അനിവാര്യമായ ജയവും സ്വന്തമാക്കി കിരീടപ്രതീക്ഷ നിലനിര്‍ത്തി.
നിങ്ങളുടെ വാട്സപ്പിൽ അതിവേഗം വാർത്തകളറിയാൻ ജാഗ്രതാ ലൈവിനെ പിൻതുടരൂ Whatsapp Group | Telegram Group | Google News | Youtube
സൗദി പ്രോ ലീഗില്‍ അല്‍നസ്‌റിനു പിന്നില്‍ മൂന്നാം സ്ഥാനക്കാരാണ് അല്‍ഷാദാബ്. അല്‍ഇത്തിഹാദാണ് ഒന്നാം സ്ഥാനത്തുള്ളത്. ഇന്നലെത്തെ മത്സരത്തില്‍ തോറ്റാല്‍ നസ്‌റിന്റെ കിരീടപ്രതീക്ഷകള്‍ അസ്തമിക്കുമായിരുന്നു. മത്സരം തുടങ്ങി 25-ാം മിനിറ്റില്‍ തന്നെ ഷാദാബ് ആദ്യ ഗോളുമായി നസ്ര്‍ ക്യാംപിനെ ഞെട്ടിച്ചു. ക്രിസ്റ്റ്യൻ ഗുവാൻക്കയാണ് ലക്ഷ്യം കണ്ടത്. 40-ാം മിനിറ്റില്‍ വീണ്ടും ഗുവാൻക്ക മറ്റൊരു ഗോളുമായി നസ്‌റിനെ പ്രതിരോധത്തിലാക്കി.
രണ്ട് ഗോളിന് പിന്നില്‍നിന്ന ശേഷം 44-ാം മിനിറ്റിലായിരുന്നു നസ്‌റിന്റെ തിരിച്ചുവരവ്. അല്‍ഹസ്സന്റെ അസിസ്റ്റില്‍ ബ്രസീല്‍ മധ്യനിര താരം ആൻഡേഴ്‌സൻ ടാലിസ്‌കയാണ് ആദ്യ ഗോള്‍ മടക്കിയത്. വീണ്ടും ഹസ്സന്റെ അസിസ്റ്റില്‍ അബ്ദുറഹ്മാൻ ഗരീബും ലക്ഷ്യം കണ്ടു. അല്‍നസ് ര്‍-2, അല്‍ ഷാദാബ്-2. എട്ടു മിനിറ്റ് കഴിഞ്ഞാണ് ക്രിസ്റ്റ്യാനോയുടെ കിടിലൻ ഗോള്‍ പിറന്നത്. ഗുസ്താവോയുടെ അസിസ്റ്റ് സൂപ്പര്‍ താരം കൃത്യമായി ഗോള്‍വലയിലാക്കിയപ്പോള്‍ അത് നസ്‌റിന്റെ വിജയഗോള്‍ കൂടിയായി.
