ബിബിസി ടോപ് ഗിയർ ഇന്ത്യ അവാർഡ് 2023 : ‘പെട്രോൾഹെഡ് ആക്ടറായി’ ദുൽഖർ

2023 ലെ ബിബിസി ടോപ് ഗിയർ ഇന്ത്യ അവാർഡ് ദുൽഖർ സൽമാന്. പെട്രോൾഹെഡ് ആക്ടറിനുള്ള അവാർഡാണ് താരം സ്വന്തമാക്കിയത്. ചുപ് എന്ന ചിത്രത്തിലെ അഭിനയമാണ് ദുൽഖറിനെ അവാർഡിന് അർഹനാക്കിയത്.

മലയാളത്തിലെ അഭിനേതാക്കളിൽ പെട്രോൾഹെഡ് ആക്ടറിനുള്ള പുരസ്കാരം ലഭിക്കുന്ന ആദ്യ നടനാണ് ദുൽഖർ. മികച്ച വില്ലനുള്ള ദാദാസാഹിബ് ഫാൽക്കേ പുരസ്കാരം ലഭിച്ചതിന് പിന്നാലെയാണ് ഈ പുരസ്ക്കാരം ലഭിക്കുന്നത്.

ആർ ബൽകി രചനയും സംവിധാനവും നിർവഹിച്ച ചുപ്പ് സൈക്കോളജിക്കൽ ത്രില്ലർ വിഭാഗത്തിൽ പെടുന്ന ചിത്രമാണ്. ദുൽഖറിന്റെ മൂന്നാമത്തെ ബോളിവുഡ് ചിത്രമായിരുന്നു ഇത്.

അതേസമയം, ‘കിംഗ് ഓഫ് കൊത്ത’യാണ് ഇനി ദുൽഖറിന്റേതായി പുറത്തിറങ്ങാനുള്ള മലയാള ചിത്രം. ഈ വർഷം ഓണത്തിന് ചിത്രം റിലീസ് ചെയ്യും. വെഫേറർ ഫിലിംസും സീ സ്റ്റുഡിയോയും ചേർന്നാണ് ചിത്രം നിർമ്മിക്കുന്നത്. പ്രശസ്ത സംവിധായകൻ ജോഷിയുടെ മകൻ അഭിലാഷ് ജോഷിയാണ് ചിത്രത്തിന്റെ സംവിധാനം .