ലണ്ടൻ : ഇംഗ്ലീഷ് പ്രീമിയർ ലീഗില്‍ ലിവർപൂളിന്റെ ക്ലാസിക് തിരിച്ചുവരവ്. ഇന്ന് ആൻഫീല്‍ഡില്‍ ബ്രൈറ്റണ് എതിരെ ഒരു ഗോളിന് പിന്നില്‍ പോയ ശേഷം രണ്ടാം പകുതിയില്‍ തിരിച്ചടിച്ച് വിജയിക്കുകയായിരുന്നു ലിവർപൂള്‍.മത്സരത്തില്‍ 14ആം മിനുട്ടില്‍ റൈറ്റ് വിംഗർ ആയി കളിച്ച കദിയോഗ്ലു ആണ് ബ്രൈറ്റണ് ലീഡ് നല്‍കിയത്. ആദ്യ പകുതിയില്‍ ബ്രൈറ്റണ് ലീഡ് ഉയർത്താൻ നല്ല അവസരങ്ങള്‍ സൃഷ്ടിച്ചു എങ്കിലും ലക്ഷ്യം കണ്ടില്ല.രണ്ടാം പകുതിയില്‍ 69ആം മിനുട്ടില്‍ ഗാക്പോയുടെ ഒരു ക്രോസ് ജഡ്ജ് ചെയ്യുന്നതില്‍ ബ്രൈറ്റണ് ഡിഫൻസിന് വന്ന പിഴവ് ലിവർപൂളിന്റെ സമനില ഗോളായി. ഈ ഗോള്‍ വന്ന് മൂന്ന് മിനുട്ടിനുള്ളില്‍ സലായിലൂടെ ലിവർപൂള്‍ ലീഡും എടുത്തു. തന്റെ ഇടതു കാലില്‍ കട്ട് ചെയ്ത് ബോക്സിലേക്ക് കയറിയ സലാ മനോഹരമായ ഒരു ഷോട്ടിലൂടെ പന്ത് വലയില്‍ എത്തിക്കുക ആയിരുന്നു. സ്കോർ 2-1.ഈ വിജയത്തോടെ ലിവർപൂള്‍ 25 പോയിന്റുമായി ലീഗില്‍ ഒന്നാം സ്ഥാനത്ത് നില്‍ക്കുകയാണ്. ബ്രൈറ്റണ് 16 പോയിന്റുമായി ഏഴാം സ്ഥാനത്തും നില്‍ക്കുന്നു.
