ഇംണ്ടൻ: ഇംഗ്ലീഷ് പ്രീമിയർ ലീഗില്‍ വമ്ബന്മാരായ ആഴ്സണലിനെ അട്ടിമറിച്ച്‌ ന്യൂകാസില്‍ യുനൈറ്റഡ്. എതിരില്ലാത്ത ഒരു ഗോളിനാണ് ഗണ്ണേഴ്‌സിനെ ന്യൂകാസില്‍ വീഴ്ത്തിയത്. സ്വന്തം തട്ടകമായ സെന്റ് ജെയിംസ് പാർക്കില്‍ ന്യൂകാസിലിനുവേണ്ടി 12ാം മിനിറ്റില്‍ അലക്‌സാണ്ടർ ഇസാക്കാണ് വിജയ ഗോള്‍ നേടിയത്. കിരീടപോരില്‍ മുന്നിലെത്താനുള്ള ആഴ്സണലിന്‍റെ പ്രതീക്ഷകള്‍ക്ക് തോല്‍വി കനത്ത തിരിച്ചടിയായി. സീസണില്‍ ടീമിന്‍റെ രണ്ടാം തോല്‍വിയാണിത്. ഇതോടെ പോയന്‍റ് പട്ടികയില്‍ നാലാം സ്ഥാനത്തേക്ക് വീണു. ആദ്യാവസാനം വരെ ആക്രമണത്തിലും പ്രതിരോധത്തിലും മികച്ചുനിന്നത് ന്യൂകാസില്‍ തന്നെയാണ്. വലതുവിങ്ങില്‍നിന്ന് ബോക്‌സിലേക്ക് ആന്റണി ഗോർഡൻ നല്‍കിയ ക്രോസാണ് തകർപ്പൻ ഹെഡ്ഡറിലൂടെ ഇസാക്ക് വലയിലാക്കിയത്. ഈസമയം ആഴ്സണലിന്‍റെ പ്രതിരോധ താരങ്ങള്‍ കാഴ്ചക്കാരായി നോക്കില്‍ക്കുകയായിരുന്നു. ഗോള്‍ വഴങ്ങിയതോടെ സന്ദർശകർ ആക്രമണത്തിന്റെ മൂർച്ചകൂട്ടിയെങ്കിലും ഫിനിഷിങ്ങിലെ പോരായ്മകള്‍ തിരിച്ചടിയായി. രണ്ടാം പകുതിയില്‍ മൈക്കല്‍ അർട്ടേറ്റ ടീമില്‍ മാറ്റങ്ങള്‍ വരുത്തിയെങ്കിലും ഫലമുണ്ടായില്ല. അവസാന മിനിറ്റുകളില്‍ ഗണ്ണേഴ്‌സ് സമനില ഗോളിനായി കിണഞ്ഞുശ്രമിച്ചെങ്കിലും ന്യൂകാസില്‍ പ്രതിരോധിച്ചു. ജയത്തോടെ 10 മത്സരങ്ങളില്‍നിന്ന് 15 പോയന്‍റുമായി ന്യൂകാസില്‍ ഒമ്ബതാം സ്ഥാനത്താണ്. 10 മത്സരങ്ങളില്‍നിന്ന് ആഴ്സണലിന് 18 പോയന്‍റും.
