ലണ്ടൻ : ഒരുഗോളിന് പിന്നില്‍ നിന്നശേഷം മൂന്ന് ഗോളുകള്‍ തിരിച്ചടിച്ച്‌ മാഞ്ചസ്റ്റർ ഡർബിയില്‍ മാഞ്ചസ്റ്റർ സിറ്റിക്ക് ജയം.സ്വന്തം തട്ടകമായ ഇത്തിഹാദില്‍ ഒന്നിനെതിരെ മൂന്ന് ഗോളുകള്‍ക്കാണ് നിലവിലെ ചാമ്പ്യൻമാരുടെ ജയം. ആതിഥേയർക്കായി ഫില്‍ ഫോഡൻ(56,80) ഇരട്ടഗോള്‍നേടി. എർലിങ് ഹാളണ്ട്(90+1)സ്‌കോർ ചെയ്തു. യുണൈറ്റഡിനായി മാർക്കസ് റാഷ്‌ഫോർഡ്(8) ആശ്വാസഗോള്‍ നേടി. കളിയിലുടനീളം മികച്ച പ്രകടനം നടത്തിയ സിറ്റി ആദ്യാവസാനം എതിരാളികള്‍ക്ക് മേല്‍ മേധാവിത്വം പുലർത്തി. മാർക്കസ് റാഷ്‌ഫോർഡിന്റെ വ്യക്തിഗത മികവിലാണ് ചെകുത്താൻമാർ ആദ്യ ഗോള്‍ നേടിയത്. ബ്രൂണോ ഫെർണാണ്ടസില്‍ നിന്നു ലഭിച്ച പന്തുമായി മുന്നേറിയ ഇംഗ്ലീഷ് താരം ബോക്‌സിന് തൊട്ടുപുറത്ത് നിന്ന് ഉയിർത്ത അത്യുഗ്രൻ വലംകാലൻ ഷോട്ട് ഗോള്‍കീപ്പർ എഡർസനെ കാഴ്ചക്കാരനാക്കി വലയില്‍ വിശ്രമിച്ചു. എന്നാല്‍ തുടരെ തുടരെ അക്രമിച്ചെത്തിയ സിറ്റി നീക്കത്തെ ഗോള്‍കീപ്പർ ആന്ദ്രെ ഒനാനെയുടെ ഉജ്ജ്വല സേവുകളിലൂടെയാണ് സന്ദർശകർ പ്രതിരോധിച്ചത്. ആദ്യ പകുതിയില്‍ 12 കോർണർ കിക്കുകളാണ് സിറ്റിക്ക് ലഭിച്ചത്.
ആതിഥേയരുടെ ഹൈലൈൻ നീക്കങ്ങള്‍ക്കെതിരെ രണ്ടാം പകുതിയിലും പ്രതിരോധത്തിലൂന്നി കളിക്കാനാണ് യുണൈറ്റഡ് ശ്രമിച്ചത്. എന്നാല്‍ 56ാം മിനിറ്റില്‍ റാഷ്‌ഫോർഡ് നേടിയതിന് സമാനമായ ഗോളിലൂടെ ഫില്‍ ഫോഡൻ സമനില പിടിച്ചു. ബോക്‌സിനു പുറത്തുനിന്നുതിർത്ത ബുള്ളറ്റ്‌ഷോട്ട് ഒനാനയെ മറികടന്ന് വലയില്‍കയറി. സമനില നേരിട്ടിട്ടും കളിയില്‍ മാറ്റം വരുത്താൻ എറിക്ടൻ ഹാഗ് തയാറായില്ല. കൗണ്ടർ അറ്റാക്കിലൂടെ ഗോള്‍നേടുകയെന്ന തന്ത്രമായിരുന്നു ആവിഷ്‌കരിച്ചത്.
നിങ്ങളുടെ വാട്സപ്പിൽ അതിവേഗം വാർത്തകളറിയാൻ ജാഗ്രതാ ലൈവിനെ പിൻതുടരൂ Whatsapp Group | Telegram Group | Google News | Youtube
ഇതിനായി ആന്റണിയെ രണ്ടാം പകുതിയില്‍ കളത്തിലിറക്കിയെങ്കിലും കളി ഗതിയ്ക്ക് മാറ്റമുണ്ടായില്ല. 80ാം മിനിറ്റില്‍ വലതുവിങിലൂടെയുള്ള മുന്നേറ്റത്തില്‍ സിറ്റി നിർണായക ഗോള്‍ നേടി. കെവിൻ ഡിബ്രുയിനെയില്‍ നിന്ന് ലഭിച്ച പന്തുമായി കുതിച്ച ജൂലിയൻ ആല്‍വരസ് ബോക്‌സിനുള്ളില്‍ ഫില്‍ഫോഡനെ ലക്ഷ്യമാക്കി പന്ത് മറിച്ച്‌നല്‍കി. യുണൈറ്റഡ് താരങ്ങളേയും ഗോള്‍കീപ്പർ ഒനാനയേയും നിഷ്പ്രഭമാക്കി വലയിലേക്ക് തഴുതിയിട്ട് ഇംഗ്ലണ്ട് യുവതാരം രണ്ടാം ഗോള്‍കുറിച്ചു. ഇഞ്ചുറി സമയത്തിന്റെ ആദ്യമിനിറ്റില്‍ എർലിങ് ഹാളണ്ടിലൂടെ ഗോള്‍ നേടി ചാമ്ബ്യൻ ക്ലബ് മറ്റൊരു ഡെർബി കൂടി സീല്‍ ചെയ്തു. പ്രീമിയർലീഗില്‍ തലപ്പത്തുള്ള ലിവർപൂളുമായുള്ള പോയന്റ് വ്യത്യാസം ഒരു പോയന്റാക്കി കുറക്കാനും ജയത്തോടെ സിറ്റിക്കായി. യുണൈറ്റഡ് ആറാംസ്ഥാനത്ത് തുടരുന്നു.
