സ്റ്റാൻഡ് ക്ലാസ് മുറിയായി ..! നാട്ടുകാർക്ക് ക്ലാസെടുത്ത് നീണ്ടൂർ എസ്.കെ.വി സ്കൂളിലെ കുട്ടികൾ : ജാഗ്രതാ ന്യൂസ് ലൈവും മോട്ടോർ വാഹന വകുപ്പും ചേർന്ന് നടത്തിയ ബോധവത്കരണ പരിപാടി വേറിട്ട അനുഭവമായി

കോട്ടയം : കോട്ടയത്തെ ബസ് സ്റ്റാൻഡുകൾ അൽപ നേരത്തേയ്ക്ക് ക്ലാസ് മുറിയായി. നീണ്ടൂർ എസ്.കെ.വി സ്കൂളിലെ കുട്ടികൾ നാട്ടുകാരുടെ  അധ്യാപകരായി. ജാഗ്രതാ ന്യൂസ് ലൈവിന്റെയും മോട്ടോർ വാഹന വകുപ്പിന്റെ നേതൃത്വത്തിൽ കോട്ടയം നഗരത്തിലെ ബസ് സ്റ്റാൻഡുകളിൽ നടത്തിയ ബോധ വത്കരണ പരിപാടികളാണ് വേറിട്ട അനുഭവമായി മാറിയത്. നീണ്ടൂർ എസ്.കെ.വി സ്കൂളിലെ കുട്ടികളുടെ നേതൃത്വത്തിൽ കോട്ടയം കെ.എസ്.ആർ.ടി.സി സ്റ്റാൻഡിലും, നാഗമ്പടം പ്രൈവറ്റ് ബസ് സ്റ്റാൻഡിലും ഫ്ളാഷ് മോബും , സ്കിറ്റും തെരുവ് നാടകവുമാണ് അവതരിപ്പിച്ചത്. 

ഗതാഗത നിയമ ലംഘനങ്ങളിലേയ്ക്ക് വിരൽ ചൂണ്ടിയാണ് കുട്ടികൾ രംഗത്ത് എത്തിയത്. കോട്ടയം കെ.എസ്.ആർ.ടി.സി ബസ് സ്റ്റാൻഡിൽ പെൺകുട്ടികളുടെ ഫ്ലാഷ് മോബോടെയാണ് പരിപാടികൾക്ക് തുടക്കമായത്. തുടർന്ന് സ്കിറ്റും , തെരുവ് നാടകവും അരങ്ങേറി. കെഎസ്ആർടിസി സ്റ്റാൻഡിൽ കൂടി നിന്ന നൂറുകണക്കിന് ആളുകൾ കയ്യടികളോടെയാണ് കുട്ടികളുടെ കലാ പ്രകടനങ്ങളെ സ്വീകരിച്ചത്. കാഴ്ചക്കാരിൽ ഒരാൾ പരിപാടികൾക്ക് ശേഷം കുട്ടികളുടെ അടുത്തേയ്ക്ക് ഓടിയെത്തി അഞ്ഞൂറ് രൂപ സമ്മാനമായി നൽകിയത് വേറിട്ട കാഴ്ചയായി. നാഗമ്പടം ബസ് സ്റ്റാൻഡിലേയ്ക്കു പരിപാടികൾ എത്തിയപ്പോൾ കാഴ്ചക്കാരായി ഉണ്ടായിരുന്നതിൽ ഏറെയും സ്കൂൾ കോളേജ് വിദ്യാർത്ഥികളായിരുന്നു. സമൂഹത്തിൻ്റെ ഏത് വിഭാഗത്തെ ലക്ഷ്യമിട്ടാണോ സ്കൂൾ അധികൃതർ പരിപാടി അവതരിപ്പിച്ച ഇതേ വിഭാഗം തന്നെയാണ് കൂടുതലായി നാഗമ്പടത്ത് കാഴ്ചക്കാരായി എത്തിയത്. 

പരിപാടികൾ മോട്ടോർ വാഹന വകുപ്പ് കോട്ടയം ആർ.ടി.ഒ കെ.ഹരികൃഷ്ണൻ ഉദ്ഘാടനം ചെയ്തു. ഹോട്ടൽ ആന്റ് റസ്റ്ററന്റ് അസോസിയേഷൻ കോട്ടയം യൂണിറ്റ് പ്രസിഡന്റ് പി. മനോജ് കുമാർ, സെക്രട്ടറി എ.എസ് പ്രേമി, കോട്ടയം ആർടിഒ എൻഫോഴ്സ്മെന്റ് വിഭാഗം മോട്ടോർ വെഹിക്കിൾ ഇൻസ്പെക്ടർ ബി.ആശാകുമാർ, അസി.മോട്ടോർ വെഹിക്കിൾ ഇൻസെപ്കടർമാരായ ജോർജ് വർഗീസ് , പി.കെ സെബാസ്റ്റ്യൻ, എസ്.സജിത്ത്, ടി.എസ് പ്രജു, കെഎസ്ആർടിസി ഡിപ്പോ ജില്ലാ ട്രാൻസ്പോർട്ട് ഓഫിസർ എ.അജി, എന്നിവർ ആശംസകൾ അർപ്പിച്ചു സംസാരിച്ചു. ജാഗ്രതാ ന്യൂസ് ലൈവിനൊപ്പം ലക്ഷ്മി സിൽക്ക്‌സും , ഭാരത് ഹോസ്പിറ്റലും , എം.ജെ ആന്റ് കമ്പനിയും , എസ് എച്ച് ആശുപത്രിയും പോപ്പുലർ വെഹിക്കിൾസ് ആന്റ് സർവീസസും പരിപാടിയുമായി സഹകരിച്ചു. ഹോട്ടൽ ആന്റ് റസ്റ്ററന്റ് അസോസിയേഷൻ കോട്ടയം യൂണിറ്റ് കുട്ടികൾക്ക് ഭക്ഷണം വിതരണം ചെയ്ത് തങ്ങളുടെ സ്നേഹവും പങ്കു വച്ചു.