മുംബൈ : ഐപിഎല്‍ മെഗാ ലേലത്തില്‍ ഉള്‍പ്പെട്ടിട്ടുള്ള താരങ്ങളുടെ ലിസ്റ്റ് ഔദ്യോഗികമായി പ്രഖ്യാപിച്ചിരിക്കുകയാണ് ബിസിസിഐ.ആകെ 574 കളിക്കാരാണ് ഈ മാസം 24,25 തിയ്യതികളിലായി സൗദി അറേബ്യയില്‍ നടക്കാനിരിക്കുന്ന താരലേലത്തിന്റെ പൂളില്‍ ഉള്‍പ്പെട്ടിരിക്കുന്നത്. ഇതില്‍ 366 പേര്‍ ഇന്ത്യന്‍ താരങ്ങളാണെങ്കില്‍ 208 പേര്‍ വിദേശ കളിക്കാരുമാണ്. കൂടാതെ അസോസിയേറ്റ് രാജ്യങ്ങളില്‍ നിന്നുള്ള മൂന്നു പേരും ലേലത്തിന്റെ ഭാഗമാണ്. ആകെയുള്ള 574 താരങ്ങൡ 318 അണ്‍ ക്യാപ്ഡ് ഇന്ത്യന്‍ താരങ്ങളും 12 അണ്‍ക്യാപ്ഡ് വിദേശ കളിക്കാരുമുണ്ട്.ലേലത്തിലെ ഏറ്റവുമുയര്‍ന്ന അടിസ്ഥാന വിലയായ രണ്ടു കോടിയുടെ വിഭാഗത്തില്‍ 81 താരങ്ങളുണ്ട്. ഇംഗ്ലണ്ട് വൈറ്റ് ബോള്‍ ക്യാപ്റ്റന്‍ ജോസ് ബട്‌ലര്‍, ശ്രേയസ് അയ്യര്‍, റിഷഭ് പന്ത്, കാഗിസോ റബാഡ എന്നിവരടക്കമുള്ള മുന്‍നിര താരങ്ങളെല്ലാം രണ്ടു കോടി അടിസ്ഥാന വിലയുള്ള കളിക്കാരുടെ ലിസ്റ്റിലാണ് ഉള്‍പ്പെട്ടിട്ടുള്ളത്.
