സംക്രാന്തിയിൽ നിന്നും
ജാഗ്രതാ ന്യൂസ്
പ്രത്യേക ലേഖകൻ
കോട്ടയം : കെ റെയിലിന് സർവേ നടത്താൻ വ്യാഴാഴ്ച രാവിലെ ഉദ്യോഗസ്ഥ സംഘം പാറമ്പുഴ കുഴിയാലിപ്പടിയിൽ എത്തി. വ്യാഴാഴ്ച പുലർച്ചെയാണ് ഉദ്യോഗസ്ഥ സംഘം കുഴിയാലിപ്പടിയിൽ എത്തിയത്. വിവരമറിഞ്ഞ് നാട്ടുകാരും സ്ഥലത്ത് എത്തിയിട്ടുണ്ട്. ഈ സാഹചര്യത്തിൽ പ്രദേശത്ത് സംഘർഷാവസ്ഥ ഉടലെടുത്തു.
വ്യാഴാഴ്ച രാവിലെ ഏഴരയോടെയാണ് പാറമ്പുഴ നട്ടാശേരി കുഴിയാലിപ്പടിയിൽ സർവേ നടത്തി കല്ലിടുന്നതിനായി ഉദ്യോഗസ്ഥ സംഘം എത്തിയത്. തഹസീൽദാരുടെ നേതൃത്വത്തിൽ സർവേ കല്ലുകളുമായി ലോറിയിലാണ് സംഘം എത്തിയത്. ലോറിയിൽ എത്തിയ സംഘം സർവേ ജോലികൾ ആരംഭിച്ചിട്ടുണ്ട്. ഇതോടെ ജോലികൾ തടയുന്നതിനായി നാട്ടുകാരും സ്ഥലത്തേയ്ക്ക് എത്തിത്തുടങ്ങി.
നിങ്ങളുടെ വാട്സപ്പിൽ അതിവേഗം വാർത്തകളറിയാൻ ജാഗ്രതാ ലൈവിനെ പിൻതുടരൂ Whatsapp Group | Telegram Group | Google News | Youtube
സോഷ്യൽ മീഡിയ വഴി പ്രചാരണം നടത്തിയാണ് ആളുകൾ ഇവിടേയ്ക്ക് എത്തുന്നത്. ഈ സാഹചര്യത്തിൽ പ്രദേശത്ത് സംഘർഷം ഉണ്ടാകുമെന്ന് ഉറപ്പായി. പ്രദേശത്ത് വൻ പൊലീസ് സാന്നിധ്യവും ഉണ്ട്. സംഘർഷ സാധ്യത കണക്കിലെടുത്ത് കോട്ടയം ഡിവൈ.എസ്.പി ജെ.സന്തോഷ് കുമാറിന്റെ നേതൃത്വത്തിൽ പൊലീസ് സംഘവും സ്ഥലത്ത് എത്തിയിട്ടുണ്ട്. സർവേയും കല്ലിടീലും തടയുന്നതിനായി കേരള കോൺഗ്രസ് നേതാവ് അഡ്വ. പ്രിൻസ് ലൂക്കോസിന്റെ നേതൃത്വത്തിൽ നാട്ടുകാർ പ്രദേശത്ത് തമ്പടിക്കുന്നുണ്ട്.
കഴിഞ്ഞ ദിവസം ഈ സ്ഥലങ്ങളിൽ കല്ലിടാനെത്തിയ ഉദ്യോഗസ്ഥ സംഘത്തെ നാട്ടുകാർ ചേർന്ന് തടഞ്ഞിരുന്നു. രണ്ട് ദിവസം സർവേ സംഘം തടഞ്ഞ് തിരിച്ചയച്ചിരുന്നു. ഇതേ തുടർന്ന് ദിവസങ്ങളായി പ്രദേശത്ത് സംഘർഷാവസ്ഥ നില നിൽക്കുകയാണ്. കഴിഞ്ഞ രണ്ട് ദിവസവും ജില്ലാ കോൺഗ്രസ് കമ്മിറ്റി പ്രസിഡന്റ് നാട്ടകം സുരേഷിന്റെ നേതൃത്വത്തിൽ നാട്ടുകാർ പ്രദേശത്ത് സർവേ സംഘത്തെ തടഞ്ഞിരുന്നു.