ലഖ്നൗ : നടനും നിര്‍മാതാവുമായ കമാല്‍ ആര്‍. ഖാൻ എന്ന കെ.ആര്‍.കെ അറസ്റ്റിലായി. 2016ല്‍ രജിസ്റ്റര്‍ ചെയ്ത കേസുമായി ബന്ധപ്പെട്ടാണ് അറസ്റ്റ് എന്നാണ് ലഭിക്കുന്ന വിവരം. ദുബൈയിലേക്കുള്ള യാത്രാമധ്യേ മുംബൈ വിമാനത്താവളത്തിലാണ് താരം അറസ്റ്റിലായത്. കെ.ആര്‍.കെ തന്നെയാണ് വിവരം സമൂഹ മാധ്യമമായ എക്‌സിലൂടെ അറിയിച്ചത്. ‘ടൈഗര്‍ 3′ എന്ന ചിത്രം പരാജയപ്പെടാൻ കാരണം താനാണെന്നാണ് സല്‍മാൻ ഖാൻ പറയുന്നതെന്നും ഏതെങ്കിലും സാഹചര്യത്തില്‍ പൊലീസ് സ്റ്റേഷനിലോ ജയിലിലോ താൻ മരിക്കാനിടയായാല്‍ അതൊരു കൊലപാതകമായിരിക്കുമെന്നും ആരാണ് അതിന് ഉത്തരവാദിയെന്ന് നിങ്ങള്‍ക്കെല്ലാവര്‍ക്കും അറിയാമെന്നും താരം എക്‌സില്‍ പങ്കുവെച്ച കുറിപ്പില്‍ പറയുന്നു. കഴിഞ്ഞ ഒരു വര്‍ഷമായി ഞാൻ മുംബൈയിലാണ്. കോടതിയില്‍ എനിക്ക് പോകേണ്ട എല്ലാ തീയതികളിലും എത്തുന്നുണ്ട്. പുതുവര്‍ഷത്തിന് മുന്നോടിയായി ദുബൈയിലേക്ക് പോകുമ്ബോള്‍ ഇന്ന് മുംബൈ പൊലീസ് വിമാനത്താവളത്തില്‍ വെച്ച്‌ എന്നെ അറസ്റ്റ് ചെയ്തു. 2016ലെ ഒരു കേസില്‍ തിരയുന്ന ആളാണെന്നാണ് പൊലീസ് പറയുന്നത്. ടൈഗര്‍ 3 എന്ന ചിത്രം പരാജയപ്പെട്ടത് ഞാൻ കാരണമാണെന്നാണ് സല്‍മാൻ ഖാൻ പറയുന്നത്. ഞാൻ ഏതെങ്കിലും സാഹചര്യത്തില്‍ പൊലീസ് സ്റ്റേഷനിലോ ജയിലിലോ മരിച്ചാല്‍ അത് കൊലപാതകമാണെന്ന് നിങ്ങള്‍ എല്ലാവരും അറിയണം. ആരാണ് ഇതിനെല്ലാം ഉത്തരവാദിയെന്ന് നിങ്ങള്‍ക്കെല്ലാവര്‍ക്കും അറിയാം!’. അദ്ദേഹം കുറിച്ചു.
സിനിമാ താരങ്ങള്‍ക്കെതിരായ അധിക്ഷേപ പരാമര്‍ശങ്ങളിലൂടെയാണ് കമാല്‍ ആര്‍. ഖാൻ വാര്‍ത്തകളില്‍ ഇടംപിടിക്കുന്നത്. 2022ല്‍ രണ്ടുതവണ അദ്ദേഹം അറസ്റ്റിലായിരുന്നു. നടന്മാരായ ഇര്‍ഫാനും റിഷി കപൂറിനുമെതിരായ ട്വീറ്റിനെ തുടര്‍ന്നായിരുന്നു ആദ്യ അറസ്റ്റ്. പിന്നീട് ഫിറ്റ്‌നസ് ട്രെയിനര്‍ക്കെതിരായ ലൈംഗിക പീഡന ആരോപണത്തെ തുടര്‍ന്ന് രണ്ടാം തവണയും അറസ്റ്റിലായി. നിരവധി ഹിന്ദി, ബോജ്പുരി സിനിമകളില്‍ വേഷമിട്ട കെ.ആര്‍.കെ ബിഗ് ബോസ് മൂന്നാം സീസണിലും എത്തിയിരുന്നു.
