ആര്‍ ഡി എക്സ്’ എന്ന ഒറ്റ ചിത്രത്തിലൂടെ ഹിറ്റ് താരജോഡികളായി മാറിയ ഷെയ്ൻ നിഗം, മഹിമ നമ്പ്യാര്‍ എന്നിവര്‍ കേന്ദ്ര കഥാപാത്രങ്ങള്‍ ആകുന്ന ‘ലിറ്റില്‍ ഹാര്‍ട്സ്’ എന്ന ചിത്രത്തിലെ പുതിയ ഗാനം പുറത്തിറങ്ങി. ചിത്രത്തിലെ ‘ഏദൻ പൂവേ’ എന്ന് തുടങ്ങുന്ന ഗാനമാണ് ഇപ്പോള്‍ പുറത്തിറങ്ങിയിരിക്കുന്നത്. ആൻഡോ ജോസ് പെരേരയും എബി ട്രീസ പോളും ചേര്‍ന്ന് തിരക്കഥ രചിച്ച സംവിധാനം ചെയ്യുന്ന ചിത്രം സാന്ദ്ര തോമസും വില്‍സണ്‍ തോമസും ചേര്‍ന്ന് സാന്ദ്ര തോമസ് പ്രൊഡക്ഷൻസിന്റെ ബാനറില്‍ ആണ് നിര്‍മ്മിക്കുന്നത്. ഹിറ്റ് താരജോഡികളായ ഷെയ്നും മഹിമയും സിബി, ശോശ എന്നീ കഥാപാത്രങ്ങളായി സ്ക്രീനില്‍ എത്തുന്നു.
മലയോര മേഖലയുടെ പശ്ചാത്തലത്തില്‍ രണ്ടു കുടുംബങ്ങളില്‍ അരങ്ങേറുന്ന വ്യത്യസ്തമായ പ്രണയത്തെ കുറിച്ച്‌ സംസാരിക്കുന്ന ചിത്രം ബാല്യകാല സുഹൃത്തുക്കളായ സിബിയും ശോശയും ഒരു ഘട്ടത്തില്‍ തങ്ങളുടെ പ്രണയം തിരിച്ചറിയുന്നതും തുടര്‍ന്നുണ്ടാകുന്ന സംഭവവികാസങ്ങളും ആണ് പറയുന്നത്. ഷെയ്ൻ നിഗം, മഹിമ നമ്പ്യാര്‍ എന്നിവരെ കൂടാതെ ബാബുരാജ്, രഞ്ജി പണിക്കര്‍, ഷൈൻ ടോം ചാക്കോ, ജാഫര്‍ ഇടുക്കി, ഐമാ സെബാസ്റ്റ്യൻ, രമ്യ സുവി, മാല പാര്‍വതി എന്നിവരും ചിത്രത്തിലെ മറ്റ് പ്രധാന കഥാപാത്രങ്ങളെ അവതരിപ്പിക്കുന്നു. ചിത്രത്തിന്റെ ഛായാഗ്രഹണം നിര്‍വഹിച്ചിരിക്കുന്നത് ലൂക്ക് ജോസ് ആണ്. കൈലാസ് മേനോന്റെതാണ് സംഗീതം.
