ആരാധകരുടെ ഏറെക്കാലത്തെ കാത്തിരിപ്പിന് വിരാമം; ലിജോയ്ക്ക് ഒപ്പം മോഹൻലാൽ ഗുസ്തി പിടിക്കും

ലിജോ ജോസ് പെല്ലിശ്ശേരി ആദ്യമായി മോഹൻലാലിനെ നായകനാക്കി ഒരുക്കുന്ന സിനിമ വരുന്നതായ റിപ്പോർട്ടുകൾക്കിടെ പ്രോജക്റ്റ് സംബന്ധിച്ച ആദ്യ അപ്ഡേറ്റുമായി നിർമ്മാതാക്കൾ. ജോൺ ആൻഡ് മേരി ക്രിയേറ്റീവിൻറെ ബാനറിൽ ഷിബു ബേബിജോൺ ആവും ഈ ചിത്രത്തിൻറെ നിർമ്മാണം. ഈ പ്രൊഡക്ഷൻ കമ്പനിയുടെ ആദ്യ പ്രോജക്റ്റ് ആണിത്. ഈ വർഷം ജൂണിൽ കമ്പനിയുടെ ലോഗോ പ്രകാശനം ചെയ്‍തതും ഷിജു ബേബി ജോണിൻറെ അടുത്ത സുഹൃത്ത് കൂടിയായ മോഹൻലാൽ ആയിരുന്നു ഉദ്ഘാടനം ചെയ്‍തത്. പുതിയ പ്രോജക്റ്റ് ലിജോ- മോഹൻലാൽ ചിത്രമാണെന്ന് നേരിട്ട് പറയാതെ, എന്നാൽ സൂചനകളിലൂടെ പറഞ്ഞുകൊണ്ടുള്ളതാണ് ജോൺ ആൻഡ് മേരി ക്രിയേറ്റീവിൻറെ പുതിയ അപ്ഡേറ്റ്.

പുറത്തിറക്കിയ രണ്ട് പോസ്റ്ററുകളിൽ ഒന്നിൽ പിരിച്ചുവെച്ച കൊമ്പൻ മീശയും ഒരു തോൾ സഞ്ചിയുമാണ്. “പ്രതിഭയും പ്രതിഭാസവും ഒന്നാകാൻ തീരുമാനിച്ച നല്ല നാളേക്കായി ഞങ്ങൾ കൈകോർക്കുന്നു. ജോൺ ആൻഡ് മേരി ക്രിയേറ്റീവ് ബാനറിന്റെ ആദ്യ സിനിമയുമായി ഞങ്ങൾ എത്തുന്നു. ഇന്ത്യൻ സിനിമ അത്ഭുതത്തോടെ കാത്തിരിക്കുന്ന ഈ കോമ്പോ ആരാണെന്ന് ഇനി നിങ്ങൾക്കും പ്രവചിക്കാം. നന്നായി കലക്കി ഒന്നാലോചിച്ച് ഉത്തരം പറയുന്നവർക്ക് ഒരു കിടിലം സർപ്രൈസ് കാത്തിരിക്കുന്നു.. ഊഹാപോഹങ്ങളുടെ കെട്ടഴിക്കുമ്പോൾ ചിലപ്പോൾ നിങ്ങളുടെ ഉത്തരവും ശരിയായേക്കാം”, എന്നാണ് പോസ്റ്ററുകൾക്കൊപ്പമുള്ള കുറിപ്പ്. നിർമ്മാതാക്കൾ ഉദ്ദേശിക്കുന്നത് ലിജോ- മോഹൻലാൽ പ്രോജക്റ്റ് ആണ് എന്നതിന് ഇതിലും വലി തെളിവ് ആവശ്യമില്ലെന്ന വിലയിരുത്തലിലാണ് ആരാധകർ. സോഷ്യൽ മീഡിയ ഈ വാർത്തയെ ആഘോഷിക്കാനും തുടങ്ങിയിട്ടുണ്ട്.

യുവനിരയിലെ ശ്രദ്ധേയ സംവിധായകർക്കൊപ്പം മോഹൻലാൽ സിനിമകൾ ചെയ്യുന്നത് കാണാൻ ആരാധകരുടെ ഏറെക്കാലത്തെ കാത്തിരിപ്പുണ്ട്. അദ്ദേഹത്തിൻറെ ഓരോ പുതിയ ചിത്രം ഇറങ്ങുമ്പോഴും സോഷ്യൽ മീഡിയ സിനിമാഗ്രൂപ്പുകളിൽ ഈ വിഷയം ചർച്ചയാവാറുമുണ്ട്. യുവനിര സംവിധായകരിൽ ഏറെ ശ്രദ്ധേയനായ ലിജോ ജോസ് പെല്ലിശ്ശേരിക്കൊപ്പം മോഹൻലാൽ ഒരു ചിത്രം ചെയ്യാൻ ഒരുങ്ങുന്നതായ വാർത്ത ഏതാനും ആഴ്ചകളായി സോഷ്യൽ മീഡിയയിൽ പ്രചരിച്ചിരുന്നു. ലിജോ ജോസ് പെല്ലിശ്ശേരിക്കൊപ്പമുള്ള മോഹൻലാലിൻറെ ഒരു ചിത്രം ഇന്നാണ് സോഷ്യൽ മീഡിയയിൽ എത്തിയത്.

പ്രമുഖ ട്രേഡ് അനലിസ്റ്റ് ശ്രീധർ പിള്ള ഈ പ്രോജക്റ്റ് വൈകാതെ നടക്കുമെന്ന് ട്വീറ്റും ചെയ്തിരുന്നു. മോഹൻലാലും ലിജോ ജോസ് പെല്ലിശ്ശേരിയും ഒന്നിക്കുന്ന ചിത്രം സംബന്ധിച്ച വൻ പ്രഖ്യാപനം വരുന്നു. ഒരു പുരാവൃത്തത്തെ ആസ്പദമാക്കിയുള്ള ബിഗ് ബജറ്റ് പിരീഡ് ചിത്രം. മോഹൻലാൽ ഒരു ഗുസ്‍തിക്കാരനാണ് ചിത്രത്തിൽ. 100 ശതമാനം ഉറപ്പാണ് ഈ പ്രോജക്റ്റ്. ഷിജു ബേബി ജോൺ നിർമ്മിക്കുന്ന ചിത്രം രാജസ്ഥാനിൽ 2023 ജനുവരിയിൽ ആരംഭിക്കും, എന്നാണ് ശ്രീധർ പിള്ളയുടെ ട്വീറ്റ്.

മമ്മൂട്ടി നായകനായെത്തുന്ന നൻപകൽ നേരത്ത് മയക്കമാണ് ലിജോ ജോസ് പെല്ലിശ്ശേരിയുടെ സംവിധാനത്തിൽ പുറത്തെത്താനുള്ള ചിത്രം. മമ്മൂട്ടി കമ്പനിയുടെ ബാനറിൽ മമ്മൂട്ടി തന്നെയാണ് ഈ ചിത്രത്തിൻറെ നിർമ്മാണം. ഡിസംബറിൽ തിരുവനന്തപുരത്ത് നടക്കുന്ന കേരള രാജ്യാന്തര ചലച്ചിത്ര മേളയിലേക്ക് ചിത്രം തെരഞ്ഞെടുക്കപ്പെട്ടിരുന്നു. മിക്കവാറും ചിത്രത്തിൻറെ ആദ്യ പ്രദർശനവും ഇതാവും.