തിരുവനന്തപുരം : മുഖ്യമന്ത്രി പിണറായി വിജയന്റെ ‘മലപ്പുറം’ പരാമർശത്തിന്മേൽ നിയമസഭയിൽ 12 മണിക്ക് നടത്താനിരുന്ന അടിയന്തര പ്രമേയ ചർച്ച നടത്തില്ല. ശക്തമായ കയ്യാങ്കളിയെ തുടർന്ന് ഇന്നത്തേക്ക് സഭ പിരിഞ്ഞിരിക്കുകയാണ്. നിയമസഭ സ്വർണ്ണക്കടത്തുമായി ബന്ധപ്പെട്ട് മുഖ്യമന്ത്രി നടത്തിയ മലപ്പുറം പരാമർശവും കള്ളക്കടത്ത് പണം ദേശ വിരുദ്ധ പ്രവണതകൾക്ക് ഉപയോഗിക്കുന്നെന്ന പരാമർശവും സംസ്ഥാനത്തിന് അവമതിപ്പ് ഉണ്ടാക്കിയെന്ന് ചൂണ്ടിക്കാട്ടി സണ്ണി ജോസഫ് എംഎൽഎയാണ് അടിയന്തര പ്രമേയത്തിന് നോട്ടീസ് നൽകിയത്.
തന്റെ പരാമർശത്തിന് മേൽ ബോധപൂർവ്വം തെറ്റിദ്ധാരണ ഉണ്ടാക്കുകയാണെന്നും ഈ വിഷയം അടിയന്തിരമായി ചർച്ച ചെയ്യണമെന്നും മുഖ്യമന്ത്രിയും സഭയിൽ ആവശ്യപ്പെട്ടു. ഇതോടെയാണ് സ്പീക്കർ അടിയന്തരപ്രമേയത്തിന് അനുമതി നൽകിയത്. എന്നാൽ പ്രതിപക്ഷവും ഭരണപക്ഷവും തമ്മിലുള്ള ശക്തമായ പോരിനെ തുടർന്നാണ് ചർച്ച ഒഴിവാക്കിയത്.