കൊല്ലം: ശാസ്താംകോട്ടയില്‍ പെയിന്റിംഗ് തൊഴിലാളികള്‍ തമ്മിലുണ്ടായ സംഘർഷത്തില്‍ ഒരാള്‍ തലയ്ക്കടിയേറ്റ് മരിച്ചു. ആലപ്പുഴ കോട്ടപ്പുറം സ്വദേശി വിനോദാണ് മരിച്ചത്. സംഭവത്തില്‍ കൊല്ലം അയത്തില്‍ സ്വദേശി രാജുവിനെ പൊലീസ് അറസ്റ്റ് ചെയ്തു. ശാസ്താംകോട്ടയില്‍ ക്ഷേത്ര സദ്യാലയത്തിലെ പെയിന്റിംഗ് ജോലിക്കായി എത്തിയ വിനോദും രാജുവും തമ്മില്‍ താമസ സ്ഥലത്ത് വച്ച്‌ തർക്കമുണ്ടായിരുന്നു.
മദ്യലഹരിയില്‍ ആയിരുന്ന ഇരുവരുടെയും വഴക്ക് സംഘർഷത്തില്‍ കലാശിച്ചു. വാക്ക് തർക്കത്തിന് പിന്നാലെ കമ്പിവടി ഉപയോഗിച്ച്‌ വിനോദിനെ രാജു തലയ്ക്കടിക്കുകയായിരുന്നു. ഗുരുതര പരിക്കേറ്റ വിനോദിനെ താലൂക്ക് ആശുപത്രിയില്‍ എത്തിച്ചെങ്കിലും ജീവൻ രക്ഷിക്കാനായില്ല. പുലർച്ചെ പെയിന്റിംഗ് സാമഗ്രികള്‍ കൊണ്ടുവന്നയാളുടെ മുന്നില്‍ വച്ചായിരുന്നു സംഘർഷം നടന്നത്. ഇരുവരും മദ്യലഹരിയിലായിരുന്നതായി ഇയാള്‍ പൊലീസിന് മൊഴി നല്‍കി. കൊല നടത്തിയ ശേഷം ഒളിവില്‍ പോകാൻ ശ്രമിച്ച രാജുവിനെ ശാസ്താംകോട്ടയില്‍ വച്ച്‌ പൊലീസ് പിടികൂടി. കോടതിയില്‍ ഹാജരാക്കിയ ശേഷം പ്രതിയെ റിമാൻഡ് ചെയ്തു.
